Ураҙа тураһында хәҙистәр

"Ураҙа ҡалҡан булып тора. Ураҙа тотоусы әҙәпһеҙлектән ары торһон һәм наҙан кешеләй булмаһын. Кемдер уның менән бәхәсләшеп маташһа йәки битәрләй башлаһа, ике тапҡыр: “Мин ураҙаламын!” - тип әйтһен" ("Әл-Бохари"). "Йәнем Уның ҡулында булыусы менән ант итәм, ураҙа тотоусының ауыҙынан килгән еҫ Аллаһ Тәғәлә өсөн хуш еҫле майға ҡарағанда ла яҡшыраҡ. Һәм Аллаһ: “Ул Минең өсөн аҙыҡтан, эсемлектән һәм теләктәренән баш тарта. Уның был ураҙаһы - Минең өсөн. Һәм Мин бының өсөн әжерен бирәсәкмен. Изге эш өсөн әжер ун тапҡырға күберәк,” - тип әйтә" (әл-Бохари, Мөслим, Әбү Дауд, ибн Мәджә). "Әгәр ҙә кеше алдауын һәм ялғанланыуын туҡтатмаһа, ашауҙан һәм эсеүҙән баш тартыуы Аллаһҡа кәрәкмәй" (Әл-Бохари) "Өс кешенең доғаһы кире ҡағылмай:1)Ауыҙ асҡансы ураҙа тотоусының2)Ғәҙел хакимдың3)Ҡыйырһытылған кешенең" (Әхмәд, Әт-Тирмиҙи). "Әгәр ҙә кемдер (ураҙа ваҡытында) онотолоп китеп ашап йә эсеп ташлаһа, ураҙаһын артабан дауам итһен. Сөнки, дөрөҫлөктә, Аллаһ уны ашатты һәм эсерҙе" (Әл-Бохари, Мөслим). "Рамаҙан айы еткәс, күк ҡаплары асыла, Тамуҡ ҡапҡалары ябыла һәм шайтандар бығаулана" (Әл-Бохари). "Кем Рамаҙан айында әжергә ышанып һәм өмөтләнеп ураҙа тотҡан, шуның быға тиклем булған гонаһтары ғәфү ителер" (Әл-Бохари, Мөслим). "Рамаҙан айында Аллаһҡа зикер итеүселәр ғәфү ителер. Һәм Аллаһтан һораусыларҙың доға кире ҡағылмаҫ" (Мөслим). "Таң алдынан ашағыҙ, сөнки сәхәрҙә бәрәкәт бар" (Әл-Бохари). "Кемегеҙҙер ауыҙ асһа, финик менән ауыҙ асһын, сөнки ул емештә бәрәкәт бар. Финик булмаһа, һыу менән ауыҙ асығыҙ, сөнки ул да таҙартыусы нәмәләрҙән" (Әт-Тирмиҙи). "(Ауыҙ асыр ваҡытта) тиҙерәк ураҙаларын туҡтатырға ашығыусылар изгелектә булыр" (Мөслим). "Ҡөҙрәтле һәм Бөйөк Аллаһ былай тигән: “Ураҙанан башҡа, Әҙәм балаһының бөтә ғәмәлдәре лә үҙе өсөн эшләнелә, сөнки, дөрөҫлөктә, ул (ураҙа) – Минең өсөн. Һәм Мин уның өсөн әжерен бирәсәкмен" (Әл-Бохари). "Ҡиәмәт көнөндә ураҙа менән Ҡөрьән Аллаһтың ҡоло өсөн шәфәғәтлек итәсәк. Ураҙа әйтер: “Раббым! Яҡты ваҡытта мин уны ашауҙан һәм эсеүҙән айырҙым. Уның өсөн шәфәғәтлек итергә рөхсәт итсе миңә!” Ә Ҡөрьән былай тиер: “Раббым! Мин уны төндәрен йоҡоһонан айырҙым. Уның өсөн шәфәғәтлек итергә рөхсәт итһәңсе!” Һәм уларҙың шәфәғәте ҡәнәғәтләндерелер" (Әхмәд). Интернеттағы төркөм өсөн Нәркәс Алсынбаева әҙерләне. Айрат Нурмөхәмәтов фотоһы.