Бәхетле һәм ныҡлы ғаиләләр ни тиклем күберәк, дәүләтебеҙ ҙә шунса ҡеүәтлерәк. Шундай ғаиләләрҙең береһе, ярты быуатлыҡ тормош юбилейын билдәләгән Рәмилә һәм Финат Юнысовтар Асҡын районының Ҡубыяҙ ауылында йәшәй. Кешеләргә һәм хеҙмәткә яҡшы мөнәсәбәт, бер-береңде ярты һүҙҙән аңлау, яуаплылыҡ ғаиләләренең ныҡлы нигеҙен тәшкил итә. Хаҡлы ялға сыҡҡас та улар ауылдың йәмәғәт тормошонда әүҙем ҡатнашып йәшәй, тирә-яҡты төҙөкләндереүҙә, махсус хәрби операцияла ҡатнашыусыларға гуманитар ярҙам туплауҙа булыша, тип яҙа “Аскинская новь”. Рәмилә Хәбибша ҡыҙы хеҙмәт юлын тыуған ауылындағы мәҙәниәт йортонда художество етәксе булып башлай. Үҙе лә спектаклдәрҙә ҡатнаша, йырлай, бейей. Ун йыл дауамында балалар баҡсаһы мөдире булып та эшләй. Хаҡлы ялға сыҡҡансы йәнә ауыл мәҙәниәт йортонда эшләргә, ауылдаштары өсөн йөкмәткеле, күңелле байрам ойошторорға өлгөрә. Ул - әле лә “Ағинәйҙәр” фольклор-йыр коллективының әүҙем ағзаһы. Ғаилә башлығы Финат Ғилемхан улы “Үрмияҙ” совхозында водитель булып эшләй.Башҡа райондарға ла ураҡ осоронда ярҙамлашырға тура килә. Аҙаҡ ферма мөдире, бригадир, янғын һүндереүсе була. Ҡайҙа ғына эшләмәһен, үҙ бурысын намыҫ менән үтәй, төрлө наградаларға лайыҡ була. Юнысовтар хеҙмәткә яуаплы мөнәсәбәттәрен балаларында ла тәрбиәләй алған. Өс улдары ла хәҙер хәстәрлекле атай. Өлкәне Ришат Ҡубыяҙ мәҙәниәт йортонда газ ҡаҙанлығы операторы булып эшләй. Данил ғаиләһе менән Өфөлә донъя көтә. Бөгөн ул махсус хәрби операция зонаһында хеҙмәт итә. Яңыраҡ сираттағы ялға ҡайтып, ата-әсәһен алтын юбилейҙары менән ҡотланы. Төпсөк улдары Зинфир шулай уҡ ғаиләһе менән Өфөлә йәшәй. Олатай менән өләсәй хәҙер ейәндәрен һәм бүләһен тәрбиәләүҙә ярҙам итә. Рәмилә Хәбибша ҡыҙы улдарының һәр береһе өсөн тулҡынланып йәшәй, айырыуса Данил өсөн. – Һуғышҡа улын оҙатҡан әсәнең нимә тураһында уйлауы мөмкин? Әлбиттә, борсолам, йөрәк урынында түгел. Бөтә һалдаттарҙың да тиҙерәк иҫән-имен тыуған йорттарына әйләнеп ҡайтыуын теләйем! – ти әсә. Әсә доғаларының ҡабул ителеренә ышанабыҙ. Фото: https://vk.com/askinskayanov