Өфө хакимиәтенең архитектура һәм ҡала төҙөлөшө баш идаралығы начальнигы Руслан Хәйруллин “Яңылыҡтар” программаһында әңгәмәлә 450 йыллыҡ юбилейы йылында баш ҡаланың нисек үҙгәрәсәге тураһында таныштырҙы. 2024 йылда Ленин, Карл Маркс, Пушкин, Коммунистик һәм Яңы күпер урамдарын яңыртыуға айырыуса иғтибар бүленә, сөнки бында төп байрам саралары үтәсәк. – Тротуарҙарға һәм үткәүелдәргә гранит плитка һалыу һәм фасадтарҙы яңыртыу күҙаллана. Эскәмйәләр һәм урналар, шулай уҡ фонарь бағаналары һәм хатта урам люктары берҙәм формаға эйә буласаҡ. Урам яҡтылығынан бөтә сымдарҙы ер аҫтына һуҙалар. Шулай уҡ адреслы алтаҡталарҙы һәм магазин яҙыуҙарын берләштереү планлаштырыла, – тип хәбәр итте Руслан Хәйруллин. Өфөнөң баш архитекторы һүҙҙәренсә, реконструкцияның берҙәм концепцияһы раҫланған. – Хакимиәт хеҙмәткәрҙәре ошо урамдарҙа урынлашҡан эшҡыуарҙар һәм бина хужалары менән эш алып бара, – тине ул. – Магазиндарҙың һәм кафеларҙың алтаҡталары бәләкәйерәк һәм ҡыҫҡараҡ буласаҡ, әммә, шуға ҡарамаҫтан, трафик, киреһенсә, артасаҡ, сөнки урамдар матурыраҡ һәм уңайлыраҡ буласаҡ. Тимәк, был урындарға ҡала халҡы һәм ҡунаҡтар ағымы тәьмин ителәсәк. Ҡатнашыусыларҙың 80 проценты яңы концепция менән ризалашҡан. Руслан Хәйруллин мәғлүмәттәре буйынса, әле яҙыуҙарҙың бер өлөшө үҙәк урамдарҙа законһыҙ урынлаштырылған – әгәр эшҡыуарҙар уларҙы күрһәтмәләрҙән һуң алып ташламаһа, мэрия хоҡуҡ боҙоусыларҙың аншлагтарын һүтергә хоҡуҡлы. Эштәрҙең иң ҡиммәт өлөшө – гранит тротуарҙар. Бынан тыш, урамдарҙа бюджеттан тыш финанслау иҫәбенә бәләкәй архитектура формаларын һәм төрлө арт-объекттар ҡуйыу күҙаллана. Бағыусы булып эшҡыуарҙар сығыш яһай ала, ә ҡала уларҙың исемдәрен ҡуйылған композицияларҙа урынлаштырырға әҙер. – “Ҡунаҡ” урамдарын яңыртыуҙың раҫланған концепцияһы “сығанаҡтарға ҡайтыуҙы” күҙ уңында тота, – тип аңлатты Руслан Хәйруллин. – Был, атап әйткәндә, йорт фасадтарының төҫтәр гаммаһын үткән быуат башында булғанға ҡайтарыу. Мәғлүмәттәр Башҡорт мәҙәни мираҫы яҙмаларында табылған: тарихи биналарҙың күпселек фотолары ҡара-аҡ гаммала төшөрөлһә лә, һаҡ таныҡлыҡтарына төҫтәрҙең тасуирламаһы бар. Әммә ҡайһы бер биналар хәҙерге ҡиәфәтендә ҡаласаҡ: был, мәҫәлән, башта тарихи ҡиәфәттә тергеҙелгән Ҡунаҡһарай һәм яңы ғына тергеҙелгән Эске эштәр министрлығы бинаһы. Свердлов һәм Яңы Күпер урамдарында ҙур булмаған күләмдә эштәр көтөлә. Ленин урамында мөһим үҙгәртеп ҡороуҙар планлаштырыла, унда мәҙәни мираҫ объекттары күп. Бынан тыш, ул ҡаланың иң оҙон магистрале. – Ленин урамында шулай уҡ өс ҙур сәскә скверы төҙөләсәк: “Родина” кинотеатры, “Башҡортостан” дәүләт концерт залы һәм Йәштәр театры янында. Был йәйгеһен йәйелдерелгән күсмә йәшелләндереү буласаҡ, – тип һөйләне Өфөнөң баш архитекторы. Фото: ufacity.info.