Ағиҙел уҡыусылары "Крит-2024" конкурсында сығыш яһаясаҡ

Ағиҙел ҡалаһының белем биреү ойошмаларында уҡыусылар “Мәғариф” милли проектының “Һәр баланың уңышы” төбәк проекты сиктәрендә мәғлүмәти технологиялар буйынса “Крит” республика конкурсында ҡатнаша. Конкурсты ойоштороусы – Башҡортостандың Мәғариф һәм фән министрлығы һәм Мәғарифты үҫтереү институты. Р.К. Холбан исемендәге Ағиҙел ҡалаһының 1-се урта мәктәбендә урынлашҡан “Үҫеш нөктәһе” үҙәгендә “Крит-2024” республика конкурсының муниципаль этабы үтте, унда төрлө номинацияларҙа 1-11-се кластарҙағы 27 ҡатнашыусы эштәрен тәҡдим итте. Уҡыусылар мәғлүмәт технологиялары өлкәһендәге үҙ проекттары менән таныштырҙы (уйын программаларын әҙерләү, 3D моделдәр, сайт проекттары, анимация роликтары һәм компьютер музыкаһы). "Конкурс йомғаҡтары буйынса ҡатнашыусыларҙың бер нисә эше еңеүсе һәм призер тип танылды. Беҙ ошондай әһәмиәтле сарала еңеү яулаған балаларыбыҙ өсөн сикһеҙ шатбыҙ һәм ғорурбыҙ! Муниципаль этап еңеүселәре Өфө ҡалаһында “Крит-2024” республика конкурсында ҡатнашыуын дауам итәсәк. Балаларҙы уңышлы сығыш яһауҙары менән ҡотлайбыҙ һәм артабан да еңеүҙәр теләйбеҙ!” – тинеләр конкурсты ойоштороусылар. Билдәле булыуынса, “Мәғариф” (национальный проект “Образование”) милли проекты Рәсәй Президенты Владимир Путиндың май указы менән булдырылды. Фото: Ағиҙел ҡалаһы хакимиәте.