"Өмөт" барҙа дәрт һүнмәҫ

Архангелдең Абҙан ауылындағы “Өмөт” башҡорт халыҡ театрын “райондың йөҙөк ҡашы” тип атайҙар. 1951 йылдан алып эшләгән сәнғәт ойошмаһы бындай исемгә ысынлап лайыҡлы. Уның әлеге етәксеһе – үҙ эшен ихлас яратып башҡарған, халыҡ һөйөүен яулаған, әүҙем, дәртле, ижади күңелле милләттәшебеҙ Вәлимә Ишбулды ҡыҙы Өмөтбаева. – Мин – Ҡатай ырыуы ҡыҙымын. Белорет районының Арышпар ауылында күп балалы ғаиләлә тыуғанмын, – ти ул. – Урындағы мәктәптән һуң Стәрлетамаҡ ҡалаһындағы мәҙәниәт-мәғрифәт техникумында уҡыным. Тәүҙә тыуған ауылымда клуб мөдире булдым, унан, кейәүгә сыҡҡас, Стәрлетамаҡ ҡалаһындағы башҡорт театрында эшемде дауам иттем. Беренсе ҡыҙым тыуғас, беҙҙе Архангел районының мәҙәниәт бүлегенә саҡырып алдылар. Абҙан ауылындағы халыҡ театрына режиссер вазифаһын ышанып тапшырҙылар. Вәлимә Ишбулды ҡыҙы һөйләүенсә, театрҙың тарихы бай. Ул электән үк драма түңәрәге булараҡ эшләп килгән. Киң билдәле классиктарҙың әҫәрҙәрен ҡуйғандар. Иң тәүҙә етәксе булып һоҡланғыс сәхнә оҫтаһы, шәп гармунсы, үҙе ябай, ихлас егет Ғәлимйән Кинйәғолов эшләгән. 1971 йылдан иһә был бурысты Стәрлетамаҡ ҡалаһындағы мәҙәниәт-мәғрифәт техникумын тамамлап килгән Ләлә Ғарипова дауам иткән. Ә 2004 йылдан – Вәлимә Өмөтбаева. Барыһы ла – эшен мөкиббән яратҡан ижадсылар. Театрҙың илле йыллыҡ юбилейын да ҙурлап уҙғарғандар. Шаулап, гөрлөп үткән ул. Тотош Архангел районы халҡы тиерлек йыйылған, ҡунаҡтар ҙа күп килгән. – Әле “Өмөт” башҡорт халыҡ театрында 18 – 74 йәшлек утыҙ самаһы кеше шөғөлләнә. Төрлө һөнәр эйәләре улар. Нәжиб Асанбаев, Туфан Миңнуллин, Мостай Кәрим, Әнғәм Атнабаев кеүек олуғ әҙиптәрҙең әҫәрҙәрен сәхнәләштерергә тырышабыҙ, – ти Вәлимә Ишбулды ҡыҙы. – Көнүҙәк проблемаларҙы күтәреп, халыҡҡа театрҙың кәрәклеген, әһәмиәтен аңлатырға тырышабыҙ. Өҫтәүенә беҙҙә “Осҡон” балалар театры эшләй – үҙебеҙгә алмаш тәрбиәләйбеҙ. Талантлы йәштәребеҙгә артабан республикабыҙҙағы сәнғәт уҡыу йорттарының театр бүлектәренә уҡырға инергә ярҙам итәбеҙ. Әле ошо рәүешле ике студентыбыҙ белем алып йөрөй. Бик күп фестивалдәрҙә ҡатнашып, дипломдарға, лауреат исемдәренә лайыҡ булдыҡ. Төрлө райондарға, ауылдарға сығып спектаклдәребеҙҙе күрһәтәбеҙ. Һигеҙ актерыбыҙға “Өмөт” театрының атҡаҙанған артисы исемен бирҙек. Хөрмәтле дуҫтар! “Халыҡ таланттары” конкурсында ҡатнашыусыларға әүҙем тауыш биреүегеҙҙе һорайбыҙ. Фотолар В. Өмөтбаеваның шәхси архивынан алынды.