Дүртөйлө татар драма һәм комедия театры 2017 йылдың 13 октябрендә ойошторола һәм 2018 йылдың 1 февралендә эшләй башлай. Тәүге көндәрҙән үк театрҙың художество етәксеһе итеп Татарстандың атҡаҙанған мәҙәниәт хеҙмәткәре Азамат Хәмитйән улы Ғилманов тәғәйенләнә. Дүртөйлө татар драма һәм комедия театры - Дүртөйлө ҡалаһында берҙән-бер профессиональ театр. Биш йыл эсендә театрҙың даими тамашасылары барлыҡҡа килгән. Театр район күләмендәге Масленица, Һабантуй, Нептун көнө, скейт – “Иген” паркын асыу, Ҡупшы шыршы көнө, Ҡыш бабай резиденцияһын асыу тантанаһында, шулай уҡ башҡа байрамдарҙа әүҙем ҡатнаша. Драма һәм комедия театрында 15 кеше эшләй. Театрҙа бөтә осор дауамында Ф. Бүләковтың “Яратаһыңмы-яратмайһыңмы?”, А. Коровкиндың “Бизнес класлы палата”, М. Кәримдең “Ай тотолған төндә”, балалар өсөн Г. Ғилмановтың “Шүрәлеләр ни атлы?", А. Ғилмановтың “Хужа” әҫәрҙәре буйынса спектаклдәрҙе сәхнәләштергәндәр. Балалар өсөн “Әгәр дуҫым менән юлға сыҡһам", “Театр йөрәге”, ”Нимә ул яҡшы һәм нимә ул насар?”, “Чебурашка байрамға ашыға” һәм башҡа тамашалар бүләк итәләр. Дүртөйлө татар драма һәм комедия театры репертуарында әле 10 спектакль бар. Ауылдарға ла сығып тамашалар ҡуялар. Декабрҙә балаларҙың Яңы йыл тамашаларын әҙерләү һәм күрһәтеү буйынса әүҙем эш башлана. Һәр йәш категорияһы өсөн театрҙа махсус тамаша әҙерләнә, мәҫәлән, иң бәләкәй балалар өсөн театрҙа “Ҡышҡы әкиәт” ҡурсаҡ тамашаһы күрһәтелә. Өлкәндәр өсөн актерҙар художество етәксеһе А. Ғилманов яҙған “Һәр кемгә Яңы йыл килә” спектаклен әҙерләй. Дүртөйлө татар драма һәм комедия театры “TERRA ZIMA” Яңы йыл фестивале сиктәрендә “Бөтә Рәсәй Ҡарһылыуҙар парадында” ҡатнаша һәм “Ҡарһылыуҙарҙың иң яҡшы командаһы” исеменә лайыҡ була. Дүртөйлө районы муниципаль районы биләмәһендә VI Бөтә донъя фольклориадаһы (Фольклориада-2021) үтә. Дүртөйлө татар драма һәм комедия театры етәксеһе Азамат Ғилманов әле "Башҡортостан" гәзитенең Халыҡ-ара театрҙар көнө айҡанлы "Бәйләнештә" төркөмөндә ойошторған "Халыҡ таланттары" конкурсында ҡатнаша. Уңыштар теләйбеҙ! Фото: Азамат Ғилмановтың ғаилә альбомынан.
