“Һаулыҡ һаҡлау” милли проектының тәүге звеноны яңыртыу программаһына ярашлы, Бәләбәй районы Приют район дауаханаһының поликлиникаһына яңы флюорограф алынды. Флюорография - үпкә сирҙәрен иртә асыҡлауҙа иң һөҙөмтәле ысулдарҙың береһе, шул иҫәптән туберкулезды ла асыҡларға ярҙам итә. Ҡорамалда табип-рентгенолог тарафынан эшләнгән һәр һүрәт сирҙе диагностикалауҙа мөһим роль уйнай. Туберкулез – йоғошло сирҙәргә килтереүсе төп сирҙәрҙең береһе, ул донъяла киң таралған үлем сәбәптәренең тәүге тиҫтәһенә инә. Донъяла һәр йыл һайын туберкулез менән бер нисә миллион кеше ауырый, бары грамоталы ойошторолған иҫкәртеү һәм ваҡытында дауалау саралары сирҙән ҡотҡара ала. Тикшереү үткәреү өсөн флуоресцентлы экран һәм рентген нурланышы файҙаланыла, ул кешенең ағзалары һәм туҡымалары аша үтә, һөҙөмтәлә күләгәле һүрәтләнеш фотографияһы үпкә торошон күрһәтә. – Яңы ҡорамал автоматлаштырылған һәм аҙ нурланыш дозаһына эйә, был табиптар өсөн уңайлы һәм пациенттар өсөн хәүефһеҙ, – тип билдәләне рентген-лаборант Асия Сәлихова. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһының маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: https://health.bashkortostan.ru/presscenter/news/613160/