Өфөлә балалар юл-транспорт йәрәхәттәренә бәйле хәл етди булып ҡала

17 марттан республикала Башҡортостан буйынса Эске эштәр министрлығының ЮХХДИ идаралығының сираттағы иҫкәртеү операцияһы башланды. “Иғтибар, балалар!” 7 апрелгә тиклем дауам итә. Сараның бурысы – балалар ҡатнашлығында юл-транспорт ваҡиғалары һанын һәм уларҙың эҙемтәләренең ауырлығын кәметеү, шулай уҡ киң йәмәғәтселектең иғтибарын балаларҙың юл-транспорт йәрәхәтен иҫкәртеү проблемаларына йәлеп итеү. – Әлегә Өфөлә балалар юл-транспорт йәрәхәттәренә бәйле хәл етди булып ҡала. ЮХХДИ хеҙмәткәрҙәре водителдәргә арауыҡты һәм тиҙлек режимын һаҡларға, балаларҙың - пассажирҙармы, йәйәүлеләрме – юл хәрәкәтендә ҡатнашыусы булғанын онотмауҙы, уларға иғтибарҙы арттырыуҙы һәм айырыуса һаҡ булыуҙы кәңәш итә, – тип хәбәр итте Рәсәй Эске эштәр министрлығының Өфө ҡалаһы буйынса ЮХХДИ идаралығының бүлек хеҙмәткәре Ләйсән Исламғәлиева. Ошо көндәрҙә “Иғтибар, балалар!” иҫкәртеү сараһына ярашлы Өфөнөң 58-се балалар баҡсаһында Дәүләт автоинспекцияһы хеҙмәткәре булды. Мәктәпкәсә белем биреү учреждениеһына килеүҙәре осраҡлы түгел. Яҙғы көндәр башланғас, урамдарҙа тап шундай йәштәге балалар күберәк күренә башлай. Был уларҙың саф һауала уйнауға өҫтөнлөк биреүенә бәйле. Йыш ҡына ололар оҙатыуынан тыш юлға сығалар һәм хәүеф тураһында уйланмайҙар. 60 тәрбиәләнеүсе Өфө ҡалаһы буйынса ЮХХДИ бүлегенең юл хәрәкәте хәүефһеҙлеген пропагандалау буйынса инспекторы өлкән полиция лейтенанты Гүзәл Сафиуллинаның сығышын ҙур иғтибар менән тыңланы. Балалар тағы ла бер тапҡыр светофор сигналдарын иҫкә төшөрҙө, нисек дөрөҫ юл аша сығырға, юл өлөшөндә уйнауҙың хәүефле икәнлеге һәм башҡа күп нәмәләр тураһында белде. Осрашыу аҙағында полиция хеҙмәткәрҙәре тәрбиәләнеүселәргә яҡтылыҡ сағылдырыусы әйберҙәр тапшырҙы. – Юл хәрәкәте ҡағиҙәләрен белеү генә түгел, уларҙы һәр ваҡыт һәм һәр ерҙә теүәл үтәргә һәм алған белемегеҙҙе урамда, хәүефһеҙ юлдарҙа ҡуллана белергә кәрәк! – тип билдәләне Гүзәл Хәниф ҡыҙы. Мәғлүмәт сығанағы: ЮХХДИ идаралығының матбуғат хеҙмәте. Фото: vk.com/ugibddmvdrb