Театрҙың бай тарихы бар

Ишембай ҡалаһында эшләп килгән Сәрүәр Сайранова исемендәге башҡорт халыҡ театры – республикала иң оло театрҙарҙың береһе. Уның тарихы 1934 йылға барып тоташа. Әлеге режиссеры Розалия Әхмәт ҡыҙы Әхмәтйәнова Башҡортостан республика мәҙәниәт техникумында режиссерлыҡҡа уҡый, унан һуң Силәбе мәҙәниәт һәм сәнғәт академияһын тамамлай. Яратҡан һөнәре буйынса 23 йыл эшләй, шуның 19-ын ул – С. Сайранова исемендәге башҡорт халыҡ театры менән бергә, коллективҡа 2005 йылдан алып етәкселек итә. Һәләтле йәш режиссерҙың беренсе ижад емештәре – Нәжип Асанбаевтың “Өҙөлгән өмөт” драмаһы, балалар өсөн Туфан Миңнуллиндың “Ауыл эте Аҡбай” спектаклдәре. Розалия Әхмәт ҡыҙының тырышлығы, маҡсатҡа ынтылыусан булыуы уға яңынан коллектив туплап эшләргә ярҙам итә. Бер-бер артлы яңы премьералар донъя күрә. Н. Ғәйетбаевтың “Әстәғәфирулла”, “Яусы Йыһан” комедиялары. 2011 йылда режиссерҙың тәҡдиме буйынса башҡорт халыҡ театрына Сәрүәр Фәйзрахман ҡыҙы Сайранова исеме бирелә. 2012 йылда Т. Миңнуллиндың “Әсәйҙәр һәм бәпәйҙәр” әҫәре сәхнәләштерелә. Спектакль уңышлы булыуын раҫлап, “Алтын тирмә” республика театр фестивалендә абруйлы жюри тарафынан юғары баһалана. Унан һуң Н. Ғәйетбаевтың “Яусы Йыһан йәки нисек кейәүгә сығырға”, Ә. Атнабаевтың “Законлы никах менән!” комедиялары, “Йөрәктән йөрәккә”, “Тормош бит ул үҙе мөғжизә!” театрлаштырылған концерттары ҡуйыла. Балаларҙы ла онотмай театр коллективы. Рәсимә Ураҡсинаның “Йомро-йомро йомғағым” әкиәтен кескәй тамашасылар йотлоғоп ҡарай. Был спектакль 2015 йылда ҡала-район конкурсында Гран-приға лайыҡ була. Әсғәт Мортазиндың “Ләйсән” пьесаһын сәхнәләштереү – режиссер менән коллективтың иң уңышлы эштәренең береһе. Артистарҙың яратып уйнаған спектаклдәре араһында – Мөҙәрис Багаевтың “Ауаз бирә сал тарих” исемле драмаһы. Ул Юрматы ырыуының тарихын бәйән итә. Режиссерҙың был эше ҙур баһаға лайыҡ була: спектакль 2022 йылда Белорет ҡалаһында уҙған төбәк-ара “Алтын тирмә” фестивалендә 200 театр араһынан II дәрәжә лауреат исемен алһа, 2023 йылда “Таланттың юғарыһы” тип аталған халыҡ-ара фестиваль-конкурста 1-се урынға лайыҡ була. Розалия Әхмәтйәнова, театр режиссеры булыу менән бергә, ҡалала үткән район, республика кимәлендәге сараларҙы күркәм итеп алып барыусы ла. 90 йыллыҡ тарихҡа эйә Ишембай башҡорт халыҡ театры бөгөн һәләтле йәштәр менән дә тулыланып, ижадын уңышлы дауам итә. Әле коллектив Бөтөн донъя театр көнөндә уҙа торған юбилей кисәһен үткәреүгә әҙерләнә. Ә гәзитебеҙ төркөмөндәге конкурс дауам итә, дуҫтар. Ҡатнашыусылар өсөн тауыштарығыҙҙы йәлләмәгеҙ! Фотолар – Р. Әхмәтйәнованан.