Башҡортостанда һуңғы биш йыл эсендә, йәғни 2019 йылдан алып 2023 йылғаса 9,2 мең метр тирәһе күпер төҙөлдө һәм яңыртылды, тип хәбәр итә республиканың транспорт һәм юл хужалығы министрлығы. 1,3 мең метр оҙонлоғондағы 15 күпер “Хәүефһеҙ сифатлы юлдар” милли проекты (национальный проект “Безопасные качественные дороги”) сиктәрендә ремонтланған. Улар араһында Өфөлә Ағиҙел йылғаһы аша ике күпер араһындағы уникаль күпер–өҫтәлмә, Өфөнөң Зинино ҡасабаһында юлүткәргес тә бар. - Үткән йылда ғына Башҡортостанда 1270 метр оҙонлоғонда күпер ремонтланды һәм 460 метр күпер ҡоролмалары төҙөлдө һәм реконструкцияланды, - тине Башҡортостандың Транспорт һәм юл хужалығы министры Александр Клебанов. Бындай миҫалдарҙы күп килтерергә мөмкин. Ғафури районында Ағиҙел йылғаһы аша 406 погонлы метр оҙонлоғонда күпер ремонтланған, Иглин районында Сим йылғаһы аша күпер ҡоролмаһы төҙөкләнгән. Былар барыһы ла “Хәүефһеҙ сифатлы юлдар” милли проектына ярашлы башҡарылған. Быйыл Өфөлә Шаҡша күперен ремонтлау дауам итәсәк. Шулай уҡ Стәрлетамаҡ ҡалаһында ла Ағиҙел күперен төҙөкләү башланасаҡ. Быйыл барлығы кәмендә һигеҙ күперҙе яңыртыу ниәтләнә. ”Хәүефһеҙ сифатлы юлдар” милли проекты Рәсәйҙең транспорт министрлығы тарафынан Рәсәй Президентының “2030 йылға тиклем Рәсәй үҫешенең милли маҡсаттары һәм стратегик бурыстары” тураһындағы указын үтәү өсөн әҙерләнгән. Фото: “Башҡортостан” ДТРК-һы.