Ах, был Гөлшат!..

Бәйгелә ҡатнашҡан гүзәл заттар араһында үтә дәртле, һәләтле, өлгөр ҡатын-ҡыҙҙар бихисап. Уларҙың береһе – Ишембайҙа йәшәгән Гөлшат Күскилдина. Гөлшат менән яҡынданыраҡ таныштырыу, уның башҡарған эштәрен, мауығыуҙарын һанап бөтөүе һис тә еңел түгел. Сөнки өлгөрмәгән бер генә ере лә юҡ уның. Ейәнсура районында тыуған ҡыҙ ғаиләлә ҡустыһы Азамат менән бергә үҫә. Мәктәпте тамамлағас ул саҡтағы Башҡорт дәүләт университетының Башҡорт филологияһы һәм журналистика факультетына уҡырға инә. Бында уҡыу йортоноң “Ирәндек” бейеү ансамбленә йөрөй башлай. Ул саҡтарҙа ансамбель менән Рәсәй генә түгел, Германия, Италия, Болгария кеүек илдәрҙең сәхнәһен дә гөрләтә улар. Әйткәндәй, ире Аяз менән дә ошонда танышалар. Бергә бейеп, уҡып йөрөгән йәштәр ғашиҡ булыша һәм дүртенсе курста өйләнешеп тә ҡуя. Уҡыуҙарын тамамлағас, йәш белгестәр Ишембай ҡалаһына барып төпләнә. Гөлшат Ишембайҙың 18-се мәктәбендә башҡорт теле һәм әҙәбиәте уҡытыусыһы булып эш башлай. “Шулай уҡ урындағы телевидениела диктор, хәбәрсе була. Ун йылдан яҙмыш елдәре уларҙы Силәбе өлкәһенең Һатҡы ҡалаһына алып барып ташлай. Бында ла юғалып ҡалмай йәштәр. Гөлшат балаларҙан бейеү ансамбле төҙөп ебәрә, уға “Дарман” тип исем ҡуша. Ансамбль өлкә генә түгел, ил кимәлендәге ярыштарға сыға, бик күп еңеүҙәр яулай. Өс йылдан Күскилдиндәр кире Ишембайға әйләнеп ҡайта. Был юлы Гөлшат ҡалала урынлашҡан ябыҡ типтағы махсус белем һәм тәрбиә биреү учреждениеһында педагог-ойоштороусы булып урынлаша. Шунда уҡ журналистика һәм фото төшөрөү түңәрәктәрен алып бара. Уның ғорурлығы – бер тәрбиәләнеүсеһе Мәскәүҙә халыҡ-ара журналистика белгеслеге буйынса юғары уҡыу йортона уҡырға ингән. Шулай уҡ Гөлшат “Беҙ бергә” ҡатын-ҡыҙҙар йәмәғәт ойошмаһының әүҙем ағзаһы. Әхирәттәре менән бик күп саралар үткәрәләр, ирекмәнелек, хәйриә эштәре менән шөғөлләнәләр. Гөлшаттың мауығыуҙары бик күп. Ул йырлай, бейей, бәләкәйҙән шиғыр яҙа. Спорт менән дә дуҫ, саңғыла йөрөү, йүгереү һәм волейбол менән ныҡлап шөғөлләнә. Ә буш ваҡытында ул – тамада. Йырлап, бейеп матур итеп туйҙар, юбилейҙар, никахтар алып бара. – Йырларға яратам. Ылығыуым көслө күрәһең, төрлө республика конкурстарында ҡатнаштым. “Дуҫлыҡ моңо”нда лауреат, “Гәлсәр һандуғас” финалисы булдым. Быйыл “Сәләм” телеканалы ике йырыма клип төшөрҙө һәм үҙендә күрһәтә башланы. Ә яңыраҡ уларҙы “Туған тел” каналы күреп ҡалған һәм үҙҙәрендә күрһәтергә рөхсәт һораны. Хәҙер мине унда ла күрергә була, – ти Гөлшат. Телевидениела эшләгән йылдарында Гөлшаттың камераға һөйөүе уяна. Һәм ул әлеге ваҡытта популяр булған блогерлыҡ менән ҡыҙыһына башлай. Был эштә уға ғаиләһе, ҡайны менән ҡәйнәһе ярҙам итә, бергәләп ҡыҙыҡлы вайндар төшөрәләр. Әле ул был йәһәттән уҡыуҙар үткән һәм һәләтен артабан үҫтерергә йыйына. Тамашасылары ла ҡыҙыҡһынып ҡарай һәм был уны артабан төшөрөргә дәртләндерә. Ошо тиклем эшмәкәрлектәре араһында ул өс балаға әсәй булып та өлгөргән. Ҙур ҡыҙҙары Нәргизәгә 17 йәш. Ул әле 11-се класта уҡый, тик яҡшы билдәләргә өлгәшә, музыка мәктәбен ҡыҙыл диплом менән тамамлаған. Уртансы ҡыҙы Айгизә спортты үҙ итә. Киләсәктә табип булырға хыяллана. Улар икеһе лә Зәки Вәлиди исемендәге 2-се башҡорт республика гимназия-интернатында белем ала. Төпсөктәре Нәзиргә биш йәш, малай ҙа үҙенең уңыштары менән ата-әсәһен ҡыуандырып ҡына тора. Тормош иптәше Аяз шулай уҡ танылған спортсы. Көрәш буйынса – республика чемпионы, етди итеп саңғы, йүгереү менән шөғөллөнә. Майор дәрәжәһендә ул, холоҡ төҙәтеү учреждениеһында эшләп йөрөй. Ә буш ваҡытында ҡатынының һәр башланғысында ярҙам итә. Бына шундай матур, һәләтле ғаилә йәшәй Ишембайҙа. Уларҙа киләсәктә уңыштар, ә Гөлшатҡа еңеү теләйбеҙ. Фотолар ғаилә архивынан.