"Гөрләтеп эшләп йөрөүем менән мин бәхетле"

“Башҡортостан” гәзитенең социаль селтәрҙә ойоштогрған “Иң яҡшы ойоштороусы ҡатын-ҡыҙ” конкурсында Туймазы ҡалаһынан Гөлмирә Бикбулатова (Ҡарабаева) ҡатнаша. Гөлмирә Йәмил ҡыҙы – Халыҡтар дуҫлығы йортоноң Туймазы филиалының башҡорт тарихи-мәҙәни үҙәгенең баш белгесе, Башҡортостан Республикаһының мәғариф алдынғыһы, “Илһам шишмәләре” төбәк-ара шиғриәт фестивале лауреаты, “Сүмесле ай”, “Мәрйендәр” шиғырҙар йыйынтыҡтары авторы, Рәсәй һәм Башҡортстан Журналистар союздары ағзаһы, “Хеҙмәт даны” миҙалы менән бүләкләнгән. Быйыл ул “Ҡатын-ҡыҙ - милләт әсәһе” Бөтә Рәсәй конкурсы финалисы булды, “Берҙәм Рәсәй” партияһының төбәк бүлексәһенең Рәхмәт хаты менән бүләкләнде. Гөлмирә Йәмил ҡыҙы Ейәнсура районының Башҡорт Самаҙыһы ауылында тыуып үҫкән. 1987 йылда Ейәнсура районы Абзан мәктәбен тамамлағас, “Ейәнсура таңдары” (ул ваҡыттағы “Октябрь байрағы”) гәзитенә машинистка булып хеҙмәт юлын башлай. Бер йылдан Башҡорт дәүләт университетының башҡорт филологияһы һәм журналистикаһы факультетына уҡырға инә. Студент йылдарында тел ғилеме кафедраһында лаборант булып эшләй. Ситтән тороп уҡыу бүлегенә күскәс, район гәзите редакцияһына ҡайтып, тәржемәсе булып эшен дауам итә. Кейәүгә сыҡҡас, Юлдаш ауылына күсеп, мәктәптә эшләй башлай. Артабан ауыл клубында директор булып эшләп ала. Ошо мәлдә ул ойоштороу һәләтен үҫтерә, кеше менән уртаҡ тел табырға өйрәнә, сыныға. 1995 йылда ҡулына диплом алған белгесте Туймазы ҡалаһына эшкә ебәрәләр. Өс йәшлек улы һәм тормош иптәше менән ҡалаға күсеп, өр-яңынан тормош башлайҙар. – Мәктәптә гиҙеп йөрөп эшләүем йылдары һиҙелмәй ҙә үткән дә киткән, хәҙер мин - ветеран уҡытыусымын. Ошо йылдар эсендә күпме тауҙар артылыу, кире ҡолап төшөүҙәр, уңыш һәм уңышһыҙлыҡтар кисерелде, әммә рух-дәртте һүндермәй, "мин булмаһам, кем" тигән тормош девизын алға ҡуйып, тормош үренә яңынан ынтылыуҙар... Һөҙөмтәлә, үҙем эшләп киткән ҡаланың 3-сө, 2-се һәм 6-сы мәктәптәренең тәрбиәле, тырыш уҡыусылары һәм мәрхәмәтле ата-әсәләре, коллегаларым, бөгөн мине ихтирам итеп, онотмай, һәр яңы уңышым өсөн шатланып, уртаҡлаша икән, тимәк, ғүмерем бушҡа үтмәгәндер тим. Уҡыусыларымдың әле лә һағынып, мәктәптә кире ҡайтыуымды һорауы ғына ла күп нәмә хаҡында һөйләй, – тип уртаҡлашты Гөлмирә Бикбулатова. Гөлмирә Йәмил ҡыҙы шиғырҙар, хикәйәләр ижад итә, 1998 йылда “Илһам шишмәләре” төбәк-ара шиғриәт фестивале лауреаты булған. “Сүмесле ай”, “Мәрйендәр” йыйынтыҡтары донъя күргән. Риф Бикбаев, Игорь Шебалин, Рәмзин Әбсәләмов, Фәниә Ғәйнуллина кеүек һәүәҫкәр композиторҙар Гөлмирә Бикбулатованың шиғырҙарына йырҙар ижад иткән. Мәктәп йылдарынан яҙыша ул, республика, район гәзит-журналдары менән хеҙмәттәшлек итә – шиғыр, хикәйә һәм мәҡәләләре донъя күрә. Туймазы районынында сыға башлаған “Йәнтөйәк”, бөгөн “Етегән” район-ара башҡорт гәзите хәбәрсе һәм корректор эшен төп эше менән бер рәттән алып барырға ла өлгөрә. Йәмәғәт эшендә лә әүҙем ҡатнаша, “Ағинәйҙәр” төркөмөнөң әүҙем ағзаһы. – Уйымдан ғына үткәндәремә байҡау яһап, шундай һығымтаға килдем – мин бәхетле кеше! Бәхет төшөнсәһен һәр кем үҙенсә аңлай, әлбиттә. Ә мин тыуған илемдә йәшәүем, туғандарымдың, дуҫтарымдың күп булыуы, ғаиләм, күңелемә ятышлы һөнәр һайлап, гөрләтеп эшләп йөрөүем менән бәхетле, – ти Гөлмирә Йәмил ҡыҙы. Фото: Гөлмирә Бикбулатованың ғаилә архивынан.