Өфөләге Ағиҙел йылғаһы аша аркалы күпер ҡасан файҙаланыуға тапшырылыр?

Башҡортостанда биш йыл эсендә 7,9 мең километрҙан ашыу юл һәм туғыҙ мең погон метрҙан ашыу күпер төҙөлдө, ремонтланды һәм реконструкцияланды. Шул иҫәптән 1,5 мең километрҙан ашыу юл һәм 1282 погон метр күпер “Хәүефһеҙ сифатлы юлдар” милли проекты сиктәрендә ремонтланған. Эштәр терәк юл селтәренә ингән объекттарҙа, туристик урындарға алып барған трассаларҙа, бәләкәй тораҡ пункттарҙа, шулай уҡ ҙур ауылдарҙа һәм ҡалаларҙа халыҡтың транспортҡа инеү мөмкинлеген тәьмин иткән юлдарҙа алып барыла. – Эштәр, шул иҫәптән эре инфраструктура объекттарында ла, алып барылды. Ҡыҫҡа ваҡыт эсендә (2019-2021 йылдар) Өфөлә Ағиҙел йылғаһы аша ике күпер араһында уникаль күпер төҙөү тамамланды. Салауат Юлаев проспекты һәм Зәки Вәлиди урамы киҫелешендә транспорт сиселеше реконструкциялана. Һөҙөмтәлә уның үткәреү һәләте 27 процентҡа арта. 2023 йылда Өфөнөң Октябрь районы Зинин ауылында транспорт сиселеше файҙаланыуға тапшырылды, – тип һөйләне Башҡортостан Республикаһының транспорт һәм юл хужалығы министры Александр Клебанов. 2024 йылда Өфөнөң Киров районында Көнсығыш сығыу юлы, Шакша күпере, Высотная, Академик Ураҡсин һәм Эшсе хәбәрселәр урамдарындағы кеүек ҙур объекттарҙа эштәр дауам итә. Башҡортостандың баш ҡалаһында “Көньяҡ ҡапҡа” проекты тормошҡа ашырыла, уның сиктәрендә инвестициялар күләме 16 миллиард һумдан ашып китә. Ул Пугачев урамын реконструкциялауҙы һәм Транспорт сиселеше менән бергә Генерал Рыленко урамын төҙөүҙе күҙ уңында тота. Шулай уҡ Өфөнөң мөһим объектын – Ағиҙел йылғаһы аша аркалы күперҙе капиталь ремонтлау башланды. Уларҙы 2024 йылда сафҡа индереү планлаштырыла. 2022 йылда юлсылар Башҡортостандың төньяҡ-көнбайышында Татарстан Республикаһы сигенән Пермь крайы сигенә тиклем М-7 Волга һәм М-12 Восток федераль автомобиль юлдарын төҙөй башланылар. Был участканың дөйөм оҙонлоғо 200 километрҙан ашыу тәшкил итәсәк. 2019 йылдан башлап муниципалитеттарға тәүге тапҡыр тораҡ пункттарға ҡырсынташ һәм ҡом-ҡырсынташ менән ҡапланған юлдар һалыуға аҡса бүленә башланы, 2,6 мең километрҙан ашыу автомобиль юлына таш түшәлгән. 2022 йылдан Башҡортостанда тәүге тапҡыр баҡса ширҡәттәренә инеү юлдарын ремонтлауға аҡса бүленә. Ике йыл эсендә бындай юлдарҙың 59 саҡрымы тиерлек ремонтланған. Был эштәргә 150 миллион һум йүнәлтелгән. 2023 йылда Башҡортостан Республикаһы Башлығы Радий Хәбиров инициативаһы менән халыҡты борсоған юлдарҙы ремонтлау программаһы эшләй башланы. Уға дүрт миллиард һум аҡса йүнәлтелә. Былтыр 170 саҡрым ремонтланған. Был йүнәлештә эш 2024 йылда ла дауам ителәсәк. Белешмә: “Хәүефһеҙ сифатлы юлдар” милли проекты Рәсәй Транспорт министрлығы тарафынан “2030 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында” Рәсәй Президенты Указы положениеларын үтәү маҡсатында әҙерләнгән. Милли проекттың масштабы бөтә илде тиерлек үҙ эсенә ала, унда Рәсәйҙең 84 субъекты (Мәскәү һәм Санкт-Петербургтан тыш) һәм 105 ҡала агломерацияһы ҡатнаша. Фото һәм мәғлүмәт сығанағы.