Башҡортостан Республикаһы Юғары Судында бүләкләү тантанаһы үтте. Башҡортостан Башлығы Радий Хәбиров Башҡортостан Республикаһы Юғары Судында төбәк судтары рәйестәре, рәйес урынбаҫарҙары менән кәңәшмәлә наградалар тапшырҙы. Шул иҫәптән почетлы отставкалағы Юғары Суд судьяһы Филиза Ғәббәсова Салауат Юлаев орденына лайыҡ булды. Башҡортостан Республикаһы Юғары Судының дәүләт граждан хеҙмәте һәм кадрҙар бүлеге начальнигы Әлмира Нурғәлиеваның намыҫлы хеҙмәте “Хеҙмәт батырлығы өсөн” миҙалы менән билдәләнде. Шулай уҡ Башҡортостан Республикаһы Башлығының Рәхмәт хаты менән Башҡортостан Республикаһы Юғары Суды биналарын матди-техник тәьмин итеү һәм ремонтлау бүлеге начальнигы Илнур Мостафин бүләкләнде. Башҡортостан Республикаһы Юғары Суды судьялары Рәсимә Әбүбәкирова, Земфира Фәйезова, Елена Михадюк, Дамир Яҡуповҡа, шулай уҡ почетлы отставкалағы Юғары Суд судьяһы Рәзинә Мугиноваға “Башҡортостан Республикаһының атҡаҙанған юрисы” тигән маҡтаулы исем бирелде. “Башҡортостан Республикаһының атҡаҙанған юрисы” маҡтаулы исеме практик йәки ғилми-тикшеренеү эштәрендә айырыуса яҡшы эшләгән, законлылыҡты һәм хоҡуҡ тәртибен нығытыу, юридик фәндәрҙе үҫтереү, юридик кадрҙар әҙерләү өлкәһендә ҡаҙаныштары булған, һөнәре буйынса 15 һәм унан да күберәк йыл эшләгән юғары квалификациялы юристарға бирелә. Бынан тыш, тантаналы шарттарҙа Башҡортостан Республикаһы буйынса баш федераль инспектор Алексей Касьянов Юғары Суд судьяһы Фәйез Ҡасҡынбаевҡа һәм Өфө ҡалаһының Ленин районы суды судьяһы Эльвира Яҡуповаға Рәхмәт хаттарын тапшырҙы. Сарала Башҡортостан Юғары Суды Рәйесе Рәил Шәйҙуллин Өфө гарнизон хәрби суды рәйесе Александр Серовты Башҡортостан Республикаһы Судьялар советының “Рәсәй Федерацияһы Судьялар советына - 30 йыл” миҙалы менән бүләкләне. “Яҡшы хеҙмәте өсөн” миҙалы менән Салауат ҡала суды рәйесе Тамара Сергеева билдәләнде. Фото һәм мәғлүмәт сығанағы: http://vs.bkr.sudrf.ru