Гөлнара Мөхәммәт ҡыҙы Фәйзуллина Дәүләкән районындағы данлы Асылыкүлдән дүрт-биш саҡырым алыҫлыҡта урынлашҡан Ҡоръятмаҫ ауылынан. Ул – мәктәп директорының тәрбиәүи эштәр буйынса кәңәшсеһе, информатика, математика уҡытыусыһы. Ике ул әсәһе, ике ейәнгә өләсәй. Районда үткәрелгән төрлө сараларҙа, йәмәғәт эшендә әүҙем ҡатнаша. "Умырзая" түңәрәгенең әүҙем ағзаһы. Бала сағында Гөлнара Мөхәммәт ҡыҙы хоҡуҡ һаҡлау органдарында эшләргә теләгән, тик Дәүләкәндәге интернатта белем алғанда уҡытыусылар мөғәллим һөнәрен һайларға кәңәш итәләр. Һөҙөмтәлә ул Башҡорт дәүләт педагогия институтының математика факультетына уҡырға инә. - Һөнәремде яратмаһам, 33 йыл эшләй алмаҫ инем. Ошо дәүерҙә уҡытыусы, мәктәп директоры урынбаҫары булып эшләнем. Әле – директорҙың тәрбиә буйынса кәңәшсеһе, математика һәм информатика буйынса ла дәрестәр алып барам, – ти уңған ҡатын. Гөлнара Мөхәммәт ҡыҙының ире һәм улдары уңышлы ғына эшләп йөрөй. Балалары үҙҙәре ғаиләле инде. Ул, ауылда йәшәгән күп ҡатындар кеүек, ҡош-ҡорт тоторға әүәҫ. Ауылдарында үткәрелгән төрлө мәҙәни сараларҙа бик әүҙем ҡатнаша. Уҡыусылары менән төрлө экскурсияларға йөрөйҙәр. Күрше ауылда яңғыҙ йәшәгән атаһын да ихтирам-иғтибарҙан төшөрмәй. Беҙ ҡатын менән һөйләшкәндә лә махсус хәрбьи операциянан ялға ҡайтҡан егеттәр менән осрашыу үткәреү хәстәрҙәре менән мәшғүл ине. Бынан тыш, яугирҙәребеҙгә уҡыусылар менән бергә шәмдәр эшләйҙәр. Гөлнара Мөхәммәт ҡыҙы – юғары категориялы уҡытыусы, хеҙмәт төрлө грамоталар менән баһаланған. Әйткәндәй, әле Дәүләкән районының Ҡоръятмаҫ ауылы республикала үткәрелгән “Айыҡ ауыл” конкурсында ҡатнаша. Был саранан да ситтә ҡалмай “Башҡортостан” гәзитенең “Бәйләнештә” төркөмөндә үткәрелгән конкурста ихлас ҡатнашҡан ҡатын. Уға уңыштар теләйек һәм уның өсөн тауыш бирәйек, лайыҡтар ҡуяйыҡ һәм етеп килгән матур яҙ байрамы айҡанлы йылы һүҙҙәребеҙ яҙылған комментарийҙарыбыҙҙы йәлләмәйек, дуҫтар! Ни тиһәң дә, 8 Март – ул сихри яҙҙың иң тәүге байрамдарының береһе. Ошо етеп килгән матур байрам айҡанлы конкурста ҡатнашҡан ҡатындарға, республикабыҙҙағы барлыҡ гүзәл зат вәкилдәренә сәләмәтлек, бәхет, ғаилә именлеге, тыныслыҡ теләйбеҙ. Фотолар Гөлнара Фәйзуллинаның шәхси архивынан.