Бөтә донъя йәштәр фестивале барған "Сириус" федераль биләмәһендә Башҡортостан Республикаһы стендында өсөнсө телекүпер ойошторолдо. Фестивалдә ҡатнашыусылар БДМУ, М. Аҡмулла исемендәге БДПУ һәм БДАУ вәкилдәренә, студенттарына үҙҙәренең фекерҙәрен, хис-тойғоларын һәм тәьҫораттарын еткерҙе. Рәсәй мәғариф министрының беренсе урынбаҫары Александр Бугаев Башҡортостан стендының почетлы ҡунағы булды. Ул республиканың Бөтә донъя йәштәр фестивалендә ойоштороу әҙерлеген юғары баһаланы. - Халыҡ-ара кимәлдә республика исеменән сығыш яһаған иҫ киткес шәп стенд. Бында милли традициялар һәм тыуған илебеҙгә, бөйөк Рәсәйгә һөйөү яҡшы сағыла. Уны фестивалдең төбәк стендтарынан иң яҡшыһы тип иҫәпләйем, - тип баһаланы Александр Бугаев. Үҙенең сәфәре барышында почетлы ҡунаҡ М. Аҡмулла исемендәге БДПУ студенттары һәм университет ректоры Салауат Сәғитов менән осрашты. Әңгәмә барышында студенттар чиновниктан үҙҙәрен ҡыҙыҡһындырған һорауҙарға яуаптар алды. Фестивалдең оҙон тарихы бар, Рәсәйҙә ул 1957, 1985 һәм 2017 йылдарҙа өс тапҡыр ғына үткәрелгән. 2024 йылда халыҡ-ара йәштәр хеҙмәттәшлеген үҫтереүгә йүнәлтелгән ҙур сара Рәсәй Президенты Владимир Путин инициативаһы менән үткәрелә. Сығанаҡ: https://pravitelstvorb.ru/news/23227/