Һинд кинофильмдарын ҡарарға яратҡан кешеләр, моғайын, Сонали Бендре тигән танылған актрисаны яҡшы хәтерләйҙер. 2018 йылда уның яман шеш сиренә юлығыуы билдәле була. Ошо ваҡытта ҡыҙҙың хәсрәткә батып яҙған хаты бөгөн һап-һау, шап-шаҡтай кешеләрҙе лә тәрән уйландырырлыҡ. Уны уҡығандан һуң ”Кешеләр! Һаулығығыҙҙың ҡәҙерен белегеҙ! Зарарлы ғәҙәттәрҙән ҡотолоғоҙ! Байлыҡ артынан ҡыуып, үҙегеҙҙе онотмағыҙ!” тип һәр кемдең иҫенә төшөргө килә. Бына ул тормоштоң аҫтын-өҫкә килтереүҙән тыш, аңды ла үҙгәрткән сир хаҡындағы хат... “Минең гаражымда донъялағы иң ҡиммәтле машина тора, тик мин бөгөн инвалид коляскаһында хәрәкәтләнәм... Минең ҙур йортомда ниндәй генә брендлы әйберҙәр, аяҡ кейемдәре, биҙәүестәр юҡ, тик минең тәнем дауахананың йоҡа ғына ябай туҡыманан тегелгән эске кейеменә уралған. Минең банк иҫәбендә аҡсам байтаҡ, тик мин уны файҙалана алмайым. Йортом әкиәт һарайындай, тик миңә уның кәрәге юҡ, дауахана – минең өйөм. Мин бер отелдән икенсеһенә күп сәйәхәт иттем, хәҙер бер лабораториянан икенсеһенә күсенәм. Мин үҙемдең фанаттарымды ҡултамғаларым менән йылдар буйы шатландырҙым. Ә хәҙер минең ҡултамғаларым – медицина ҡағыҙҙарында. Мин әхирәттәр алдында оҫта прическа эшләүсем менән маҡтана инем, ә хәҙер башымда бер бөртөк тә сәс юҡ. Аш-һыу иҫ китерлек мул ине. Уның ҡарауы, хәҙер диеталамын, көнөнә ике дарыу төймәһе йәки бер нисә тамсы дарыу һәм аҙ ғына һыу. Йорт, машина, самолет, йыһаз, иҫ китмәле ҙур абруй һәм дан – быларҙың береһе лә минең өсөн әһәмиәтле түгел. Сәләмәт булырға ғына ҙур теләк бар!” 2021 йылда, сире ҡаты, диагнозы етди булыуға ҡарамаҫтан, актриса яман шеште еңеп сыға. Фото: https://ru.wikipedia.org/wiki/%D0%91%D0%B5%D0%BD%D0%B4%D1%80%D0%B5,_%D0%A1%D0%BE%D0%BD%D0%B0%D0%BB%D0%B8