Йыраҡ ерҙән бәхет эҙләмәйсә...

"Башҡортостан" гәзитенең социаль төркөмдә "Иң яҡшы ойоштороусы ҡатын-ҡыҙ" конкурсында Бөрйән районының Исламбай ауылынан китапханасы Флүзә Батыр ҡыҙы Әхмәтйәнова ҡатнаша. Ул - ауыл старостаһы, ҡатын-ҡыҙҙар советы ағзаһы. Район кимәлендә уҙғарылған сараларҙа әүҙем ҡатнаша, конкурстарҙа призлы урындар яулай. Дүрт бала әсәһе. Һәр ауылды уңған, тырыш кешеләре биҙәй. Йыраҡ ерҙән бәхет эҙләмәйсә тыуған ауылында донья көтөүсе, дүрт балаға ғүмер биреп, бөгөнгө көндә ауыл йәшәһен өсөн бар тырышлығын һалып эшләп, йәшәп ятыусы Флүзә Әхмәтйәнова нәҡ шундайҙарҙан. Тормош иптәше Таһир Әхмәтйәнов менән 35 йыл татыу донъя көтәләр, кәртә тулы мал-тыуар аҫрайҙар, баҡса үҫтерәләр. Өс улға һәм бер ҡыҙға ғүмер биреп, һәр береһенә белем алырға ярҙам итеп, оло тормош юлына сығарғандар. Әлеге көндә ейән-ейәнсәрҙәренә ҡыуанып, бер-береһенә терәк булып, матур итеп йәшәп яталар. Флүзә Батыр ҡыҙы Исламбай ауылында тыуып үҫкән. Ул һәр яҡтан да килгән өлгөр, егәрле, көслө рухлы, сабыр холоҡло, ярҙамсыл, изгелекле, һәр кем менән уртаҡ тел табып, һәр эштә, һәр сарала әйҙәп йөрөүсе. Ул 2005 йылда клуб директоры булып эш башлай. Ошо уҡ йылды ситтән тороп китапхана эше һәм киң элемтә колледжына уҡырға инә. 2008 йылда колледжы тамамлап, Исламбай ауылында китапханасы булып хеҙмәт юлын дауам итә. Ул эшенә бик яуаплы ҡарай. Мәктәп, халыҡ менән берлектә төрлө байрам саралары үткәрә. Балаларҙы һәр яҡлап үҫтереүгә үҙ өлөшөн индерә. Китапхана ауылда үҙенә күрә халыҡты берләштереүсе, рухи яҡтан үҫтереүсе мәҙәни усаҡтарҙың береһе булып тора. Ул оҫта ойоштороусы ла, матур йырлай, ауылда йәштәргә никах теркәү тантанаһын үткәрә. Ҡыҫҡаһы, ауыл тормошонда ҡайнап йәшәй. Флүзә Батыр ҡыҙы оҙаҡ йылдар ауылдың ҡатын-ҡыҙҙар ойошмаһы рәйесе, ауыл советы депутаты булып эшләй. Бөтә Рәсәй Халыҡ иҫәбен һәм Бөтә Рәсәй ауыл хужалығы иҫәбен алыуҙа ҡатнашып, “Иң яҡшы иҫәп алыусы” билдәһе менән бүләкләнгән. Әлеге көндә ауыл старостаһы вазифаһын башҡара. Район кимәлендә үткән сараларҙан да ситтә ҡалмай. “Әхмәт әйтеше” сәсәндәр бәйгеһендә - III урын, “Супер әсәй” конкурсында - III урын, “Әйтер һүҙем бар” конкурсында I урын алған, “Йөрәк һүҙе” шиғыр һөйләүселәр бәйгеһендә лә номинацияға һәм райондың “Таң” гәзитенең махсус призына лайыҡ булған. Башҡортостан Республикаһы Мәҙәниәт министрлығының Рәхмәт хаты, Бөрйән районы хакимиәте башлығының, Бөрйән район ҡатын-ҡыҙҙары ойошмаһының, Бөрйән район мәҙәниәт бүлегенең маҡтау һәм рәхмәт хаттары, Аҫҡар ауыл биләмәһе башлығының маҡтау ҡағыҙҙары уның намыҫлы, эшсән, үҙ бурыстарына яуаплы ҡарауы тураһында һөйләй. Айыҡ ауыл конкурсы уңайынан, ауылдың намыҫын яҡлап “Бәхетнамә” телетапшырыуына барып сығыш яһаған. "Торатау" конгресс-холында "Айыҡ ауыл: граждандар башланғыстары һәм социаль практика" халыҡ-ара ғилми-ғәмәли конференцияла ҡатнашып, диплом менән бүләкләнгән. Уңған ханым бар яҡлап та өлгөрөргә тырыша. Балаларын, ейәндәрен тәмлекәстәр менән һыйлай, аш-һыуҙы төрләндереп бешерергә, баҡсала емеш-еләк, гөлдәр үстерергә өлгөрә, халҡыбыҙҙың милли ризыҡтарын әҙерләй. Никах, туйҙарҙа уның эшләгән буҙалары һәр саҡ табын түрендә. Үҙе етештергән ризыҡтарға заказдар ҙа ҡабул итә. Үҙ эшенән йәм табып йәшәгән, һөнәренә тоғро ҡалған кешеләр һәр ваҡыт һоҡланыу тойғоһо уята. Исламбай ауыл китапханасыһы Флүзә Әхмәтйәнова - шундайҙарҙың береһе. Фото: Флүзә Әхмәтйәнованың ғаилә альбомынын.