Илдә 2024 йылдың 15-17 мартында үтәсәк Рәсәй Федерацияһы Президентын һайлауға әҙерлек дауам итә. Участка һайлау комиссиялары “ИнформУИК” федераль проектын ғәмәлгә ашырыуҙы тамамлай һәм граждандарҙы йөрөп сығыу барышында алынған ҡыҙыҡлы һандарҙы килтерә ала. Улар тауыш биреүҙең беренсе көнө башланыуға тиклем ике аҙна алдан һайлаусыларҙың кәйефен һүрәтләй. Башҡортостан Республикаһында участка һайлау комиссиялары ағзалары йорт хужалыҡтарының 93 процентын урап үткән, уларҙа 2 миллион 200 меңдән ашыу һайлаусы йәшәй. Яуаптарға ҡарағанда, һорау алынған кешеләрҙең 93,5 проценты тауыш биреүҙә ҡатнашырға ниәтләй. 104 меңдән ашыу һайлаусы өйҙә тауыш бирергә теләй. Был тикшереүҙәр Рәсәй Федерацияһының Үҙәк һайлау комиссияһы тарафынан аҙна һайын дөйөмләштерелә һәм тотош ил буйынса улар бер үк тиерлек. Бындай саралар барышында һайлауҙы ойоштороусылар граждандарға әүҙем һайлау хоҡуғын тормошҡа ашырыуға ҡамасаулаусы төрлө проблемаларҙы хәл итеү юлдары тураһында ла хәбәр итә. Мәҫәлән, һайлау көндәрендә 15, 16, 17 мартта уларҙың даими йәшәү урыны (теркәлеү урыны) буйынса булмаясағы тураһында белдергән граждандарға участка һайлау комиссияһы ағзалары бындай осраҡта “Мобиль һайлаусы” механизмы менән файҙаланыу мөмкинлеге тураһында ентекле аңлатты. Был механизм һайлаусыға үҙ участкаһынан күсергә һәм йәшәгән урыны буйынса икенсе участкаға беркетелергә мөмкинлек бирә. Бының өсөн 11 марттан да һуңға ҡалмайынса теләһә ниндәй территориаль һайлау комиссияһы, күп функциялы үҙәк йәки “Дәүләт хеҙмәттәре” порталы аша тауыш биреү урыны тураһында ғариза бирергә кәрәк. 6 марттан бындай ғаризаны теләһә ниндәй участка комиссияһы аша ла бирергә мөмкин. Республика Үҙәк һайлау комиссияһы мәғлүмәте буйынса, 35 меңдән ашыу граждан “Мобиль һайлаусы” менән файҙаланған да инде.