Бала ғына ине әле...

Февралдең һуңғы көндәрендә Йылайыр районында “Магнитогорск – Ира” юлында ҡурҡыныс авария теркәлде. Бында киске ундар тирәһендә Lada Largus менән “КамАЗ” машиналары бәрелеште. Еңел машинаның эсе тулы кеше булһа, ҙур машинаға тултырып ауыр йөк тейәлгән була. ЮХХДИ-нан хәбәр итеүҙәренсә, еңел автомобиль йөк машинаһына килеп төкөлә. “КамАЗ”дың 64 йәшлек водителе әйтеүенсә, ул боҙлауыҡ арҡаһында тауға менә алмай һәм ҡаршы һыҙатҡа килеп сыҡҡан була. Ҡыҙғанысҡа ҡаршы, бәрелеш бик көслө була, машинаның алғы яғы тулаһынса тиерлек иҙелә. Машинала ултырған биш кешенең бөтәһе лә ауыр йәрәхәттәр ала. Иң нығы артта уртала ултырған 19 йәшлек ҡыҙға эләгә. Ул табиптар килеп еткәнсе йән бирә. 31 йәшлек водителдең мейеһе йәрәхәтләнә, аяғы һына. 23, 45, 49 йәшлек өс пассажир шулай уҡ ауыр йәрәхәттәр ала һәм дауаханаға оҙатыла. Һуңғараҡ 45 йәшлек пассажир ҡатын реанимацияла йән бирә, уның түше ныҡ йәрәхәтләнә. Әле “КП-Өфө” баҫмаһы был хәлгә бер ни тиклем аныҡлыҡ индергән. Асыҡланыуынса, Lada Largus водителе бөтә пассажирҙарҙы ла юлда ултыртып алған. Улар Иҫәнғолдан Йылайырға юлланған булған. Һәләк булғандар иһә Йылайырҙан 45 йәшлек Наталья Н. менән Яңы Ергән ауылынан 19 йәшлек Элина К. булып сыҡҡан. Наталья газ хеҙмәтендә эшләгән, уның балалары һәм ейәндәре ҡалған. – Наталья яратҡан ҡатын, әсәй, ҡәйнә, апай, өләсәй ине. Ул һәр ваҡыт беҙҙең йөрәктәрҙә ҡаласаҡ. Ҡайғыбыҙҙы уртаҡлашырға ярҙам иткән кешеләргә рәхмәт, – ти уның яҡындары. 19 ғына йәшлек Элина иһә БДМУ ҡарамағындағы медицина колледжында уҡыған. Дуҫтары уны шаян һәм тормошто яратыусан һылыуҡай тип хәтерләй. Ул һәр ваҡыт йылмайған. Ата-әсәһе, ағаһы һәм апаһы өсөн уны юғалтыу ҙур фажиғәғә әйләнгән. – Бер кем менән дә хушлашмай ғына Элинабыҙ ҡараңғылыҡта тороп ҡалды. Шул тиклем һорауҙар күп, ә яуап юҡ. Ҡайғыны сағылдырыр өсөн һүҙҙәр етмәй. Бик иғтибарлы, хәстәрлекле, асыҡ күңелле ҡыҙыҡай ине. Йәшәп тә өлгөрмәнең, – тип яҙа социаль селтәрҙә уның инәһе. – Элинабыҙ бала ғына ине. Күҙҙән йәштәр аға, туҡтатып та булмай. Тыныс йоҡла, – тип яҙа әхирәттәре. – Ата-әсәгә бала юғалтыуҙан да ҙурыраҡ ҡайғы юҡ. Һеҙҙең менән бергә илайым һәм ҡайғығыҙҙы уртаҡлашам, ныҡ булығыҙ, – тип ҡайғы уртаҡлаша дуҫтары. Фото: "КП-Өфө".