Стәрлетамаҡ районының Мырҙаш ауылы клубы – төрлө мәҙәни саралар уҙғарыу урыны ғына түгел, бында махсус хәрби операцияла ҡатнашыусы яугирҙәргә ярҙам итергә килеүселәр ҙә өҙөлмәй. Маскировка селтәрҙәре үреү, йылы ойоҡбаштар бәйләү эше йәнле бара. Районға барғанда Мырҙаш ауылы клубына инеп, тырышып эшләгән апайҙар менән әңгәмәләшеп сыҡтыҡ. –Клуб ишеге асыҡ, һәр кем үҙенә уңайлы ваҡытҡа килә, берәүҙәр иртә менән, икенселәр көндөң икенсе яртыһында. Көнөндә үк барыбыҙ ҙа үрергә өйрәнеп алдыҡ. Хәҙер 50-ләп селтәр эшләнек инде, – тип һөйләнеләр. Йылы ойоҡбаш бәйләүсе Бәһирә Мусагитова менән Фәйрүзә Насырованың да ҡулдарына күҙ эйәрмәй. – Бында ла, өйҙә лә бәйләйбеҙ. Һалдаттарҙың аяҡтары өшөмәһен өсөн ҡуныстарын оҙон итәбеҙ. Һуғыш тиҙерәк бөтһөн, яугирҙәр иҫән-һау ҡайтһын, – тигән теләктәрен еткерҙеләр. Бындай ҙур эште бары тик берҙәмлек менән генә башҡарыу мөмкин. Ололарҙы ла, йәштәрҙе лә бергә туплаған ул. ФАП-та фельдшер булып эшләүсе Альбина Буранғолова ауылы, яҡташтарына ҡарата һоҡланыуын белдерҙе. – Ауылыбыҙ ҙа, кешеләре лә матур. Тырыштар, тәртиплеләр. Эске менән мауыҡҡандар юҡ, – тине ул. Клубта “Өйәңкеләр” тигән вокал ансамбль эшләп килә. Төрлө байрамдарға концерттарҙа улар әүҙем ҡатнаша. Ауылдаштары уларҙың йырҙарын яратып ҡабул итә. Автор фотоһы.