“Беҙ баҡсасыларҙың форумын өсөнсө тапҡыр үткәрәбеҙ. Баҡсасылар йәмғиәттәре ҙур эш башҡара. Рәсәй Президенты үҙенең Федераль Йыйылышҡа Мөрәжәғәтнамәһендә уларҙың, миңә ҡалһа, күптән көткән темаһын күтәрҙе – газ үткәреү программаһы хәҙер баҡсасылар йәмғиәттәрен дә үҙ эсенә аласаҡ. Бөгөнгө форум федераль кимәлдә үтә, беҙҙең сарала илдең 15 төбәгенән вәкилдәр ҡатнаша. Һуңғы ике йылда беҙ баҡсасыларға дәүләт ҡаҙнаһынан 366 миллион һумлыҡ тура ярҙам күрһәттек, быйылғы бюджетта ошо маҡсатта 255 миллион һум тотоноу ҡаралған. Был эште артабан да дауам итәсәкбеҙ, ҡаҙнаның күләме ҙурая барған шарттарҙа ярҙам күләме лә ҙураясаҡ ”, – тине республика етәксеһе. Рәсәйҙең Дәүләт Думаһы депутаты, Баҡсасылар союзы рәйесе Олег Валенчук Рәсәй Хөкүмәте ҡурсалауында булған союздың баҡсасылар мәнфәғәтендә ниндәй эштәр башҡарыуы тураһында ентекләп һөйләне. Сарала хәбәр ителеүенсә, Рәсәйҙә 60 миллион кешенең ҡала яны баҡсаһы бар, Башҡортостандағы “дачниктар” һаны миллион ярымдан ашып китә, йәғни республика халҡының яртыһы тигән һүҙ. Улар мең ярым баҡсасылыҡ ширҡәтенә берләшкән, 30 проценты самаһы баҡсала йәй буйы йәшәй, 13 проценты көн һайын була, ҡалғандары бында ял көндәрендә йәки аҙнаһына бер нисә тапҡыр килә. Баҡсасылар илебеҙҙең аҙыҡ-түлек хәүефһеҙлеген нығытыуға тос өлөш индерә: йәшелсәнең дөйөм күләменең 60 һәм еләктең 90 проценты ошондай ҡала яны баҡсаларында етештерелә. Автор фотоһы.