Дәүләт Йыйылышы – Ҡоролтайҙа 1994 йылдың 13 октябрендәге “Һуғыш, хеҙмәт һәм Ҡораллы көстәр ветерандары тураһында” ВС-25/38 һанлы Законды үтәү сиктәрендә “Башҡортостан Республикаһында махсус хәрби операцияла ҡатнашыусыларға һәм уларҙың ғаилә ағзаларына медицина реабилитацияһы һәм сифатлы медицина ярҙамы күрһәтеү” темаһына түңәрәк өҫтәл үтте. Уны һаулыҡ һаҡлау, социаль сәйәсәт һәм ветерандар эштәре буйынса парламент комитеты рәйесе Салауат Харасов үткәрҙе. Теманы тикшереүҙә депутаттар, Башҡортостандың Ер һәм мөлкәт мөнәсәбәттәре министрлығы, Һаулыҡ һаҡлау министрлығы, Һаулыҡ һаҡлау министрлығының Республика клиник психотерапия үҙәге, Республика табип-физкультура диспансеры һәм башҡалар ҡатнашты. Түңәрәк өҫтәлде асып, Дәүләт Йыйылышы – Ҡоролтай рәйесе урынбаҫары Тамара Танһыҡҡужина был теманың дәүләт власы органдарының даими иғтибары үҙәгендә булыуын билдәләне һәм аныҡ ҡарарҙар ҡабул итеү өсөн көнүҙәк мәсьәләләрҙе хәл итеүгә иғтибарҙы йүнәлтергә саҡырҙы. Башҡортостандың һаулыҡ һаҡлау министры урынбаҫары Татьяна Саубанова махсус хәрби операцияла ҡатнашыусыларҙы һәм уларҙың ғаилә ағзаларын реабилитациялау мәсьәләләренә туҡталды. Һаулыҡ һаҡлау министрлығы мәғлүмәттәре буйынса, февраль аҙағына ҡарата бөтәһе 29 786 гражданға медицина ярҙамы күрһәтелгән. Уларҙың 19 меңгә яҡыны амбулатор ярҙам алған. 8,3 меңе – профилактик тикшереү һәм диспансеризация, 5,1 меңе – стационар дауалау үткән, 1,5 меңе консультация һәм психологик ярҙам алған. Хәрби хәрәкәттәр ветерандарын медицина реабилитацияһы буйынса терәк учреждениелары булып Республика һуғыш ветерандары клиник госпитале һәм Республика табип-физкультура диспансеры тора. Шулай уҡ психотерапевтик ярҙам реабилитацияның мөһим аспекты булып һанала. Республика клиник психотерапия үҙәге яҡындарын юғалтҡан ғаиләләргә бушлай психологик һәм психотерапия ярҙамы күрһәтеү һәм хәрби хеҙмәткәрҙәрҙе психологик реабилитациялау программаһын әҙерләгән һәм тормошҡа ашыра. Махсус хәрби операцияла ҡатнашыусыларҙың балаларын шифахана-курорт дауалауҙы ойоштороуға Башҡортостандың 11 шифахана-курорт учреждениеһы йәлеп ителгән, уларҙың дөйөм койка фонды 2 667 койка, шул иҫәптән 360 койка балаларҙың ата-әсәләре менән бергә йәшәү өсөн тәғәйенләнгән. Башҡортостандың ер һәм мөлкәт мөнәсәбәттәре министры Наталья Полянская, республика Һаулыҡ һаҡлау министрлығының республика клиник психотерапия үҙәгенең баш табибы Наталья Тулбаева, республика табип-физкультура диспансерының баш табибы Руслан Әхмәҙуллин, министрлыҡтың штаттан тыш баш белгесе, Белорет медицина округы буйынса Башҡортостан Республикаһының һаулыҡ һаҡлау, Белорет үҙәк район клиник дауаханаһының баш табибы Илдар Хәмитов һәм башҡалар хәрби хеҙмәткәрҙәрҙе һәм уларҙың ғаилә ағзаларын дауалауҙы һәм реабилитациялауҙы ойоштороуҙың айырым аспекттарын ентекләп яҡтыртты. Сарала әйтелгән фекерҙәр түңәрәк өҫтәл тәҡдимдәренә индереләсәк. Рәмилә МУСИНА һәм gsrb.ru/ru фотолары.