Яҙҙың тәүге көнө сағыу ваҡиға менән башланды

Бөгөн, 1 мартта, Өфөлә “Башҡортостан” дәүләт концерт залында VIII “Ҡатын – ҡыҙ-милләт әсәһе” Бөтә Рәсәй конкурсының йомғаҡлау сараһы үтте. Әүҙем йәмәғәт лидерҙары араһында йыл һайын үткәрелгән ҡатын-ҡыҙҙар конкурсы Башҡортостандың визит карточкаһына әүерелде, уның форматы үҙенсәлекле. Конкурс өс этапта — муниципаль, төбәк һәм Бөтә Рәсәй этабы үтте. Сараны асыу тантанаһында абруйлы ҡунаҡтар – “Ватан һаҡсылары” фонды рәйесе Анна Евгеньевна Цивилева, “Рәсәй халыҡтары ассамблеяһы” Бөтә Рәсәй ижтимағи-дәүләт ойошмаһының генераль директоры урынбаҫары Ирина Владимировна Бабакова, республика Башлығының тормош иптәше Каринэ Владимировна Хәбирова, Башҡортостан Хөкүмәте Премьер-министры урынбаҫары - финанс министры Лира Заҡуан ҡыҙы Иғтисамова ҡатнашты. "Ватан мәнфәғәттәрен яҡлаусы, үҙ һаулығы һәм үҙ ғүмере хаҡына Тыуған илгә һөйөү һәм тоғролоҡ күрһәткән яугирҙәребеҙ. Шуға күрә улар власть органдарында ла өҫтөнлөклө урындар биләргә, губернаторҙар, сенаторҙар булырға, Дәүләт Думаһында ултырырға, йәмәғәт лидерлыҡ хәрәкәттәрен етәкләргә тейеш. Президент илдә традицион ҡиммәттәрҙе һаҡлау һәм нығытыуҙың мөһимлеге тураһында күп тапҡырҙар һөйләне. Шулай уҡ ул был системала өйҙәренә ҡайтҡан геройҙарыбыҙҙың ҙур роль уйнауын һыҙыҡ өҫтөнә алды. Улар йәш быуынды тәрбиәләп, артабан да үҙ иленә файҙа килтерергә әҙер", - тине Анна Цивилева. Ул махсус хәрби операцияла ҡатнашҡан яугирҙәргә "Хәрби хәрәкәттәр ветераны" танытмаларын тапшырҙы. “Үҙенең хәйриә һәм патриотик йүнәлеше менән конкурс Башҡортостандың йөҙөк ҡашына әүерелеп, күп кенә ҡатнашыусыларҙың һәм тамашасыларҙың йөрәген яуланы. Конкурс финалсылары тормоштоң бөтә өлкәләрендә лә юғары әхлаҡи һәм профессиональ сифаттар күрһәтә. Ысын геройҙар, Рәсәй яҡлаусылары тәрбиәләгән әсәләрҙе айырыуса билдәләп үтергә кәрәк. Был тыйнаҡ ҡатын-ҡыҙҙар улдарының йөрәктәренә Тыуған илгә ысын мөхәббәт һала. Бөгөн йәштәребеҙ тап ошо миҫалдарҙа тәрбиәләнә. Ҡәҙерле ҡатын-ҡыҙҙар, көндәлек хеҙмәтегеҙ, республика һәм ил именлегенә баһалап бөткөһөҙ өлөш индергәнегеҙ өсөн рәхмәт. Һеҙгә йомарт һәм асыҡ йөрәгегеҙ, Ватан яҙмышы хаҡында ихлас хәстәрлегегеҙ өсөн рәхмәтлемен”, - тине сығышында Лира Иғтисамова. “Бәхет биләмәһе” хәйриә фондының попечителлек советы рәйесе Каринэ Хәбирова конкурсты ойоштороусыларға һәм унда ҡатнашыусыларға ярҙам һәм рәхмәт һүҙҙәрен еткерҙе. “Бөгөн был сәхнәлә беҙ ҡатын-ҡыҙҙың, әсәнең милләтебеҙгә, ҙур илебеҙгә индергән өлөшөн хөрмәтләйбеҙ", – тип билдәләне ул һәм барыһын да яҙҙың беренсе көнө менән ҡотланы. Тәбрикләү һүҙе менән “Ҡатын-ҡыҙ – милләт әсәһе” конкурсына нигеҙ һалған, БР Халыҡтары ассамблеяһы рәйесе, БР Дәүләт Йыйылышы – Ҡоролтай депутаты, Башҡорт ҡатын-ҡыҙҙары йәмғиәте етәксеһе Гөлнур Ҡолһарина сығыш яһаны. 10 номинацияла өсәр лауреат бүләкләнде: “Милләт әсәһе”, “Лидер”, “Мәҙәниәт”, “Медицина хеҙмәткәре”, “Ғалимә”, “Педагог”, “Бизнес-леди” , “Оҫтабикә”, “Көмөш ирекмән”, “Йәштәр лидеры”. Быйыл иң күп ғаризалар “Көмөш ирекмән” номинацияһында тапшырылған. VIII “Ҡатын-ҡыҙ – милләт әсәһе” Бөтә Рәсәй конкурсының финалында махсус хәрби операцияла ҡатнашыусыларҙы һәм Рәсәй Геройҙарын тәрбиәләгән әсәләр, Донбасс халҡына һәм махсус хәрби операцияһында ҡатнашыусыларға гуманитар ярҙам йыйыу буйынса ирекмәндәр хәрәкәтендә әүҙем ҡатнашыусылар, махсус хәрби операция үткәреү зонаһында фиҙакәр хеҙмәт иткән табиптар ҡатнашты. Сәхнәгә Рәсәй Геройҙарының әсәләре һәм тол ҡатындары саҡырылды. Сара сиктәрендә күргәҙмәләр, граждандарҙы ҡабул итеү ойошторолдо, ортопедик ойошмалар, реабилитация үҙәктәре үҙ продукцияһын тәҡдим ителде. Махсус хәрби операцияла ҡатнашыусыларҙың әсәләренә, ҡатындарына, тол ҡатындарына медицина ярҙамы күрһәтте. Йыйылыусылар халыҡ дауалаусылары мәктәбендә дини ойошма вәкилдәре – руханиҙар, имамдар менән кәңәшләште. Шулай уҡ Халыҡ-ара ҡатын-ҡыҙҙар көнө алдынан ҡатнашыусылар мобиль матурлыҡ салондары хеҙмәттәренән файҙаланды. Йола буйынса, финалда 17 ҡатын-ҡыҙға Рабиға Ҡушаева исемендәге Башҡорт ҡатын-ҡыҙҙары йәмғиәте миҙалдары тапшырылды. Сарала ҡатнашырға тәләгәндәрҙән бөтәһе 500-ҙән ашыу ғариза килгән. Конкурстың финалында Татарстан Республикаһынан, Пермь крайынан, ХМАО-нан, Мәскәүҙән һәм Удмуртиянан делегациялар ҡатнашты. Иң йәш ҡатнашыусыға – 18, иң тәжрибәлеһенә – 93 йәш. Конкурсты ойоштороусылар – “Ватанды һаҡлаусылар” фонды булышлығындағы Башҡортостан Республикаһының “Рәсәй халыҡтары ассамблеяһы”, Башҡорт ҡатын-ҡыҙҙары йәмғиәте, Башҡортостан Республикаһы Мәҙәниәт министрлығы һәм Халыҡтар дуҫлығы йорто. Рәмилә МУСИНА һәм Валерий ШАХОВ (Башинформ) фотолары.