29 февралдә Мәскәүҙә Башҡортостан Башлығы Радий Хәбиров Рәсәй Президенты Владимир Путиндың Федераль Йыйылышҡа Мөрәжәғәтнамәһен уҡып ишеттереү тантанаһында ҡатнашты. Мәскәүҙә үткән сарала Федерация Советы ағзалары, Дәүләт Думаһы депутаттары, Хөкүмәт ағзалары, судьялар һәм губернаторҙар корпусы, төбәктәрҙең закондар сығарыу йыйылыштары рәйестәре, традицион конфессиялар башлыҡтары, йәмәғәт эшмәкәрҙәре ҡатнашты. Журналистар менән аралашҡанда Башҡортостан Башлығы Радий Хәбиров Рәсәй Президенты Мөрәжәғәтнамәһенең төп тезистарына аңлатма бирҙе. – Иң элек, Мөрәжәғәтнамәнең махсус хәрби операция, көнбайыш дәүләттәренең беҙгә ҡаршы агрессив сәйәсәте шарттарында булыуын аңлау мөһим. Әммә, бер нимәгә ҡарамаҫтан, был Үҫеш Мөрәжәғәтнамәһе. Дошман булған илдәрҙең беҙгә ҡаршы иғлан иткән кире процестарға ҡарамаҫтан, илебеҙ үҫешә, алға бара. Аныҡлап әйткәндә, был Мөрәжәғәтнамә – социаль. Ул кешеләрҙең тормошон яҡшыртыуға йүнәлтелгән. “Ғаилә”, “Рәсәй йәштәре”, “Кадрҙар” кеүек яңы милли проекттар ҙа, перспективалы технологик башланғыстар ҙа ошоға йүнәлтелгән. Был – иң мөһиме. Шуныһы мөһим: был Мөрәжәғәтнамә ныҡ уйланылған. Президенттың һәр тәҡдиме финанстар менән нығытылған, был беҙгә уларҙы тормошҡа ашырырға мөмкинлек бирәсәк. Шәхси әйберҙәргә килгәндә, һаулыҡ һаҡлау учреждениеларын, мәктәптәрҙе яңыртыу буйынса федераль программалар барлығын беләһегеҙ. Иҫке балалар баҡсаларында, студент ятаҡтарында, юғары уҡыу йорттары һәм колледждарҙың уҡыу корпустарында тәртип урынлаштырырға кәрәклеге хаҡында күптән һөйләйбеҙ. Бөтә был тәҡдимдәр Мөрәжәғәтнамәлә сағылыш тапты һәм, шуға ярашлы, тормошҡа ашырыласаҡ. Сәнәғәткә ярҙам сараларының һәм инвестициялар йәлеп итеү өсөн төбәктәрҙе дәртләндереүҙең ярайһы уҡ артыуы бик мөһим. Әле төбәк командаларының бурысы – бөтә был программаларҙан файҙаланыу. Төбәктә инвестициялар күләмен арттырыу өсөн беҙгә бик ҡәтғи параметрҙар һәм юғары проценттар ҡуйылған. Эшләрбеҙ, – тине ул. Фото: Башҡортостан Башлығы сайты.