Владимир Путин ғаиләләргә ярҙам саралары вәғәҙә итте

Федераль Йыйылышҡа Мөрәжәғәтнамәһе барышында ил Президенты Владимир Путин балалы ғаиләләргә ярҙам итеүҙең яңы сараларын атаны. Ул торлаҡ шарттарын яҡшыртыу йәһәтенән ғаиләләргә дәүләт ярҙамына айырыуса ҙур иғтибар бүлде. “Былтыр Рәсәйҙә 110 миллион квадрат метрҙан ашыу торлаҡ төҙөлдө – 1987 йылдағы иң юғары совет күрһәткесенән – 72,8 миллион квадрат метрҙан 1,5 тапҡырға күберәк. Һуңғы алты йылда Рәсәйҙең миллионлаған ғаиләһе торлаҡ шарттарын яҡшыртҡан, шул иҫәптән 900 меңдән ашыуы – ғаилә ипотекаһы ярҙамында. Был программа 2018 йылда башланды. Тәүҙә уның менән ике һәм унан күберәк балалы ғаиләләр, һуңынан бер балалы ғаиләләр файҙалана алды. Ғаилә ипотекаһы программаһы ағымдағы йылдың июленә тиклем ғәмәлдә. Төп база параметрҙарын һаҡлап ҡалып, уны 2030 йылға тиклем оҙайтырға тәҡдим итәм", – тине Владимир Путин. Алты йәшкә тиклемге балаһы булған ғаиләләргә айырыуса иғтибар бүлергә кәрәк. Улар өсөн льготалы кредит ставкаһы элеккесә ҡала – 6 процент. Әле өсөнсө бала тыуғас дәүләт 450 мең һум күләмендә ипотека кредитының бер өлөшөн ҡаплай. Президент шулай уҡ был норманың көсөн 2030 йылға тиклем оҙайтырға тәҡдим итте. Тағы бер сара – Президент Владимир Путин балаларға һалымдан тотоп ҡалынған аҡса күләмен арттырырға тәҡдим итте. “Ата-әсәләрҙең ғаилә мәсьәләләрен хәл итеү өсөн буш аҡсаһы күберәк ҡалырға тейеш. Ике тапҡырға, айына 2800 һумға тиклем, икенсе балаға һалым ҡайтармаһын, өсөнсө һәм артабанғы балаларға 6 мең һумға ҡәҙәр арттырырға тәҡдим итәм. Шул рәүешле өс балалы ғаилә ай һайын үҙ бюджетында 1300 һум аҡсаны һаҡларға тейеш”, - тип миҫал килтерҙе дәүләт башлығы. Шул уҡ ваҡытта ул, ҡайтармаға ҡағылышлы йыллыҡ килем 350 мең һумдан 450 мең һумға тиклем артырға тейеш, тип билдәләне. Һәм бындай сара автоматик рәүештә ғариза тапшырмайынса бирелергә тейеш. Рәсәйҙә әсәлек капиталы программаһын шулай уҡ 2030 йылға тиклем оҙайтыла. Фото: "Башинформ".