Махсус хәрби операция яугирҙәре – иғтибар үҙәгендә

Әлеге ваҡытта Рәсәй Президенты Владимир Путиндың Федераль Йыйылышҡа Мөрәжәғәтнамәһе бара. Ул көтөлгәнсә сығышының ҙур өлөшөн махсус хәрби операция темаһына арнаны. Владимир Владимирович әйтеүенсә, Рәсәй халҡы бөгөн миһырбанлыҡ, үҙ-ара ярҙам өлгөһө күрһәтә. “Тыуған илебеҙ үҙ суверенитетын һәм хәүефһеҙлеген яҡлағанда, Донбасста һәм Новороссияла ватандаштарыбыҙҙың тормошон һаҡлағанда, был көрәштә хәл иткес роль нәҡ беҙҙең граждандарыбыҙға, берҙәмлегебеҙгә, тыуған илгә тоғролоғобоҙға, уның яҙмышы өсөн яуаплылыҡҡа йөкмәтелә”, – тине ул. Владимир Путин, был сифаттар МХО башында, рәсәйҙәрҙең абсолют күпселеге хуплаған саҡта уҡ күренде, тип билдәләне. Ауырлыҡтарға ҡарамаҫтан, кешеләр үҙҙәренең ҡарарынан ситләшмәй. Улар өс сменала производствола эшләй, фронтҡа үҙҙәренең ҙур булмаған аҡсаһын күсерә. Ошо маҡсатҡа миллиардлаған аҡсаны бизнес йүнәлтә. Яугирҙәр бөтә илдең улар менән бергә икәнлеген аңлай, тип билдәләне Путин. Владимир Владимирович “Ватанды һаҡлаусылар” фонды эшен баһаланы. Шулай уҡ Ватан яугирҙәре ғаиләләре комитеттары, башҡа йәмәғәт ойошмалары берләште, тине. “Бөтә власть органдарынан геройҙарыбыҙға, уларҙың яуҙан ҡайтҡанын көткән ата-әсәләре, ҡатындары, балалары һәм ғаиләләренә артабан да ярҙам күрһәтеүҙәрен һорайым”, – тине дәүләт башлығы. Рәсәй Президенты илебеҙ үҙенең хәүефһеҙлеген һаҡлау өсөн барыһын да эшләй тине. Ул илдең стратегик ядро көстәренең тулы әҙерлек хәлендә булыуын хәбәр итте. Дәүләт башлығы билдәләүенсә, яуҙа “Циркон” һуҡма гипертауыш комплексы ла, “Кинжал” комплексы ла һөҙөмтәле файҙаланыла. “Был система төҙөлөп бөткән. Әле “Авангард“ һәм “Пересвет“ комплекстары ҡоралланыуҙа файҙаланыла, “Буревестник”тарҙы һанау тамамлана. Ғәскәрҙәргә “Сармат” ракеталары килтерелгән, тиҙҙән Рәсәй уларҙы хәрби дежурҙа урынлашҡан райондарҙа күрһәтәсәк”, - тине Владимир Путин. Фото: "Кремль. Новости". Телеграм-каналы.