Рәсәй Ғәҙәттән тыш хәлдәр министрлығының Башҡортостан буйынса Баш идаралығының матбуғат хеҙмәте хәбәр итеүенсә, кисә, 9 мартта төндә Ҡырмыҫҡалы районының Бельский ҡасабаһында янғын сыҡҡан. Янғын сығыу тураһында хәбәр алынғас та, ваҡиға урынына өс ирекле янғын һүндереү командаһы һәм Ғәҙәттән тыш хәлдәр министрлығы хеҙмәткәрҙәре юлланған һәм “ҡыҙыл әтәс”те ауыҙлыҡлаған. Йорттоң яртыһы (36 кв. м) янған, ҡалған өлөшөндә ағас түшәм, иҙән һәм стеналар ныҡ зыян күргән. Ҡыҙғанысҡа ҡаршы, был юлы ла янғын ҡорбанһыҙ үтмәгән. Янған бүлмәләрҙең береһендә бер ирҙең кәүҙәһе табылған. Ул 1965 йылғы, ошо йорттоң хужаһы булып сыҡҡан. “Тәүге версия буйынса ут янған мейестән килеп сығыуы мөмкин, йортта янғын тураһында иҫкәртеүсе ҡулайлама ҡуйылмаған, ул ваҡытында өй хужаһын уятырға һәм ҡотҡарырға мөмкин ине”, - ти ведомство хеҙмәткәрҙәре. Ваҡиға урынында янғын сәбәптәре асыҡлана. Календарҙа яҙ булһа ла, алда тағы ла һалҡыныраҡ һауа торошо көтөлә. Янғынға бәйле фажиғәгә юл ҡуймау өсөн төҙөк булмаған мейес менән йылытмаҫҡа, электр селтәренә артыҡ көс төшөрмәҫкә, шулай уҡ янғын тураһында иҫкәртеүсе ҡулайлама ҡуйырға кәңәш ителә. Фото: “Башинформ”.