Үткән ялдарҙа Башҡортостан халҡы мутлашыусыларға алты миллион һумдан ашыу аҡса күсергән. Ошоноң менән бәйле Эске эштәр органдарына 30 мөрәжәғәт килгән. Рәсәй Эске эштәр министрлығының Өфө ҡалаһы буйынса идаралығының 3-сө полиция бүлегенә 65 йәшлек ҡатын мөрәжәғәт иткән. Уға мессенджерҙарҙың береһендә билдәһеҙ абоненттан хәбәр килгән. Мутлашыусы үҙен мәктәп директоры тип таныштырған. Ҡатын элегерәк тап шул мәктәптә эшләгән булған. Енәйәтсе ойошмалағы мәғлүмәттәрҙең таралыуы тураһында хәбәр итеп, банк һәм хоҡуҡ һаҡлау органдары хеҙмәткәрҙәренән шылтыратыу көтөргә ҡушҡан. Күп тә үтмәй пенсионерға шылтыратыу килә. “Белгестәр” кемдер уның исеменә кредит рәсмиләштерергә теләүен хәбәр итә. Бындай операцияға юл ҡуймаҫ өсөн банктан кредит алып, аҡсаны махсус иҫәпкә күсерергә ҡуша. Ошонан һуң уның кредиттары ябыласаҡ, тип тә вәғәҙәләргә онотмайҙар. Пенсионер енәйәтселәргә ышанып, уларҙың ҡушыуы буйынса эшләй: займға бер миллион һумдан ашыу аҡса алып, “хәүефһеҙ” иҫәпкә күсерә. Артабан ҡатын барыһын да ҡыҙына һөйләй. Улар мәктәп директоры менән үҙҙәре бәйләнешкә сығырға ҡарар итә. Һуңынан директорҙың аккаунты енәйәтселәрҙең ҡулына эләгеүе билдәле була. Учалы районынан 68 йәшлек ир ҙә “ҡармаҡҡа” эләккән. Уға йәнәһе лә “Дәүләт хеҙмәттәре” һәм кәрәҙле элемтә хеҙмәткәрҙәре шылтыратып, банк иҫәбендә ниндәйҙер шикле операциялар алып барылыуы хаҡында хәбәр иткән. Аҡсаларҙы һаҡлап ҡалыу өсөн шулай уҡ уны “хәүефһеҙ” иҫәпкә күсерергә тәҡдим иткәндәр. Һөҙөмтәлә ир кредитҡа алынған 600 мең һумды мутлашыусыларға тотторған. Әлеге ваҡытта был факттар буйынса РФ Енәйәт кодексының 159-сы статьяһы буйынса енәйәт эштәре ҡуҙғатылған. БР Эске эштәр министрлығы иҫкәртә: таныш булмаған кешеләргә аҡса күсермәгеҙ. Иҫегеҙҙә тотоғоҙ: мутлашыусылар таныштарығыҙҙың аккаунтынан да яҙа ала. Иғтибарлы булығыҙ! Фото: Ксения Калинина, Башинформ.