Өфө университетының башҡорт филологияһы, шәрҡиәт һәм журналистика факультеты деканы Гөлфирә Абдуллина етәкләгән коллективтың һәм студенттарының төрлө конкурстарҙа ҡатнашып, призлы урындар алыуы бер кемгә лә сер түгел. Ә бына тотош уҡытыусыларҙың, 11 фән кандидаты һәм бер фән докторының бергәләшеп, "Байыҡ" сәхнәһенә сығыуҙары - көтөлмәгән бер асыш булды. Үҙҙәре лә студенттары кеүек йәп-йәш, дәртле һәм һылыу ғалимәләр, дөрөҫөрәге "Шаян ғалимәләр"ҙең "Ураҡсылар" бейеүе менән сәхнәгә килеп сығыуы һәм гөрләтеп бейеүҙәре жюри ағзаларын хайран ҡалдырҙы. Ни тиһәң дә фән кандидаттарынан ғына торған төркөмдөң "Байыҡ" сәхнәһенә сығыуы - үҙе үҙенсәлекле күренеш. Был хаҡта фән кандидаттарының береһе, студент сағынан йыр-моңға, бейеүгә маһир булған курсташым, бөгөн Өфө университетының башҡорт филологияһы, шәрҡиәт һәм журналистика факультетында студенттарға белем биргән, филология фәндәре кандидаты, доцент Рәмилә Хөснетдинова "Бәйләнештә"ге сәхифәһендә түбәндәге яҙманы ҡалдырған. "БАЙЫҠ" сәхнәһенә сығыу - һәр кемдең күңеленең иң төбөндә йәшереп кенә һаҡлаған хыялылыр, моғайын. Ошо хыялды тормошҡа ашырырға этәргес булып, "Беҙ булдырабыҙ, әйҙәгеҙ, ҡыҙҙар!" - тип ышаныс биреп, дәртләндереп, осҡондан ялҡын сығарыусы - ул деканыбыҙ Гөлфирә Риф ҡыҙы.Оҙаҡ уйламаныҡ, факультетыбыҙҙың 12 уҡытыусыһы, үҙебеҙгә "Шаян ғалимәләр" тигән исем ҡуштыҡ та,Беҙ - уңған ғалимәләр,Беҙ - шаян ғалимәләр,Беҙ - эштә лә, бейеүҙә ләҺыр бирмәҫ ғалимәләр! - тинек тә "Байыҡ"та көсөбөҙҙө һынап ҡараныҡ.Башҡортостандың атҡаҙанған артисы, хореограф Марат Юлай улы Солтанов ҡуйған бейеүебеҙ (уға ҙур рәхмәт!) - бик матур сюжетлы, йөкмәткеле бейеү ине. Беҙ уны яратып ҡабул иттек. Сифат яғынан бик алдырмағанбыҙҙыр, әммә күңелебеҙҙе биреп урағын урҙыҡ, көлтәләрен бәйләнек, шаярҙыҡ, уйнаныҡ.Беҙҙе күтәрмәләп алған жюри ағзаларына, Рита Ришат ҡыҙы Өмөтбаеваға ҙур рәхмәт!Беҙ булдырҙыҡ!!!" - тип яҙған ул. Ысынлап та Һеҙ булдырҙығыҙ! Һоҡландырҙығыҙ! Артабан да уңыштар һәм балҡыштар теләйбеҙ! Фото: Рәмиәлә Хөснетдинованың "Бәйләнештә"ге сәхифәһенән.