“Һаулыҡ һаҡлау” милли проектының тәүге медицина звеноһын яңыртыу программаһына ярашлы, Үрге Тәтешле үҙәк район дауаханаһына яңы универсаль операция өҫтәле алынды.Маҡсаты асыҡ – тәүге медицина ярҙамын халыҡ ихтыяжына ярашлы йәшәү урынына яҡын ерҙә ойоштороу. Медицина өҫтәле төрлө профилдәге әмәлиәттәр үткәреү өсөн тәғәйенләнгән һәм заман хирургияһы талаптарына тулыһынса яуап бирә. Яңы ҡорамал пациент өсөн уңайлы һәм ышаныслы. Ул белгестәргә өҫтәлде төрлө бейеклектә урынлаштырырға, һығылмалы көйләргә булышлыҡ итә. –Яңы операция өҫтәленең функциялары күп. Ҡорамал әмәлиәттәрҙең бөтә төрҙәре өсөн дә ярай. Уның киң мөмкинлектәре хирург һәм ассистенттарҙы тотороҡлоҡ менән тәьмин итә, – тип билдәләне Үрге Тәтешле дауаханаһының баш табибы Илгиз Шәңгәрәев. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығының матбуғат хеҙмәте.