Баймаҡ районының Иҫке Сибай ауылының "Шәфәҡ" ағинәйҙәр ойошмаһы хәбәр итеүенсә, улар махсус хәрби операция биләмәһендәге яугирҙәргә һалма ҡырҡҡан. "Ҡурай кафеһында хәрби махсус операцияла хеҙмәт итеүсе егеттәребеҙгә ебәрер өсөн бишбармаҡ әҙерләнек. "Шәфәҡ" ағинәйҙәр ойошмаһы, ауылымдың әүҙем ҡатын-ҡыҙҙары изге эшкә ихлас ҡушылды. Башланған эш - бөткән эш, һә тигәнсе 1 тоҡ ондан милли ризығыбыҙ - бишбармаҡты йәйеп, киптереп, ҡырҡып та ҡуйҙыҡ. Бер нисә көндән кипкән күстәнәстәрҙе моҡсайҙарға тултырып, яу ҡырында йөрөгән егеттәребеҙгә оҙатасаҡбыҙ. Был эште атҡарып сығыуға оно, кәрәк - яраҡтары, йылы бүлмәһе менән тәьмин иткән кафе хужабикәһе Резеда Утарбаеваға ҙур рәхмәтебеҙҙе еткерәбеҙ. Аллаһ бирһә, тиҙерәк донъялар тынысланһын, батырҙарыбыҙ имен -һау ҡайтып төшһөндәр. Әсәйҙәрҙең, һөйгәндәренең, балаларының шатлыҡ , ҡыуаныс, бәхет күҙ йәштәрен күрергә яҙһын!" - тип яҙа улар үҙҙәренең социаль төркөмөндә. Фото һәм сығанаҡ: Баймаҡ районы Иҫке Сибай "Ағинәй" йәмәғәт ойошмаһы