Өфөлә милли проект ярҙамында “Тулҡын” паркы төҙөкләндерелде

“Торлаҡ һәм ҡала мөхите” милли проектының “Уңайлы ҡала мөхитен булдырыу” федераль проекты ярҙамында Өфөнөң Затон биҫтәһендә ғаилә менән ял итеү өсөн уңайлы һәм хәүефһеҙ урын – "Тулҡын" паркы бар. Алты йыл элек бында ҡаралмаған урман һәм бер генә төҙөкләндерелгән аллея булғанын күҙ алдына килтереүе ҡыйын. Реконструкциянан һуң “Тулҡын” паркында спорт һәм балалар майҙансыҡтары ойошторолған, ял итеү аллеялары, сәхнә, ял зоналары булдырылған, заманса яҡтыртыу һәм видеокүҙәтеү ҡуйылған. Федераль үҙәк ярҙамы булмаһа, урындағы бюджет аҡсаһы иҫәбенә генә ошондай күләмле инфраструктура проектын ҡыҫҡа ваҡыт эсендә тормошҡа ашырып булмаҫ ине. Бөгөн паркта йәштәр, балалы әсәләр, өлкән йәштәгеләр күп. Шуныһы ҡыуандыра: ҡала халҡы парктарына һаҡсыл ҡарай, миҙгелле өмәләрҙә ҡатнаша һәм күмәкләп буш ваҡытын үткәрә. “Тулҡын” паркы – Затон биҫтәһендә йәшәүселәрҙең яратҡан урындарының береһе. Көндән-көн унда өфөләр һәм баш ҡала ҡунаҡтары күбәйә. "Өфөнө хаҡлы рәүештә Рәсәйҙең иң йәшел миллионлы ҡалаларының береһе тип иҫәпләйҙәр. Башҡортостандың баш ҡалаһында тиҫтәләрсә парк, сквер, аллеялар бар. Был биләмәләр – ҡала халҡының төрлө быуындарҙың яратҡан ял итеү урындары. Милли проект ярҙамында яңы йәмәғәт киңлектәре булдырыла, ә булғандары даими яңыртыла", - тип билдәләнеләр Башҡортостандың Торлаҡ-коммуналь хужалыҡ министрлығында. Билдәле булыуынса, “Торлаҡ һәм ҡала мөхите” (национальный проект “Жилье и городская среда”) милли проекты Рәсәй Президенты Владимир Путиндың май указы менән булдырылды. Фото: Торлаҡ-коммуналь хужалыҡ министрлығы.