15 меңгә яҡын йәш кешегә бюджет нигеҙендә уҡырға инеү мөмкинлеге бар

Республикаға идара итеү үҙәге һәм Башҡортостан юлдаш телеканалы быйылғы ҡабул итеү кампанияһына арнап ойошторған брифингта ошо мәсьәләгә ҡағылышлы һорауҙарға республиканың Мәғариф һәм фән министрлығы, донъя кимәлендәге Евразия ғилми-белем биреү үҙәге вәкилдәре, шулай уҡ төбәктәге юғары уҡыу йорттары етәкселәре яуап бирҙе. Республиканың мәғариф һәм фән минисры Илдар Мәүлетбирҙин быйылғы ҡабул итеү кампанияһына ҡағылышлы мөһим яңылыҡтар тураһында хәбәр итте. Ул йылдың-йылы төбәгебеҙ вуздарында бюджет урындарының арта барыуын билдәләне. - Әгәр бынан биш йыл самаһы элек ул яҡынса 12 мең булһа, 2024 йылда – 14,8 мең. Был нисбәт 11-се класс һөҙөмтәләре буйынса БДИ һайлаған уҡыусыларҙың нисбәтенә тура килә. Әгәр беҙҙең уҡыусылар барыһы ла, йәғни 100 процент, республика университеттарында булған белгеслектәрҙе һайлаһа, улар барыһы ла бюджет урындары менән тәьмин ителәсәк, - тип билдәләне Илдар Марат улы. Шулай уҡ мәғариф һәм фән министры ҡайһы вузда күпме бюджет урыны булыуы тураһында ла мәғлүмәт менән уртаҡлашты. Өфө фән һәм технологиялар университетында бюджет урындары 5,6 меңгә яҡын. 2024 йылдың планына ярашлы беренсе курсҡа 15 мең студент ҡабул итеү планлаштырыла. Башҡорт дәүләт медицина университетында был һан 1003 тәшкил итә, шуларҙың 965-е - белгеслек һәм 38-е - бакалавриат. Медицина биофизикаһы һәм биоинженерия, биоинформатика кеүек яңы һөнәрҙәр ҙә бар. Башҡорт дәүләт педагогия университетында бюджет урындары 1,7 меңгә яҡын: 1,3 меңгә яҡыны – бакалавриатҡа һәм 400-ө – магистратураға. Өфө дәүләт нефть техник университеты бюджет нигеҙендә 3,7 меңдән ашыу йәш кешене уҡырға ҡабул итергә әҙер. Башҡорт дәүләт аграр университетында 1,4 меңдән ашыу бюджет урыны планлаштырылған. Өфө дәүләт сәнғәт институтында иң популяр йүнәлеш – актёрлыҡ. Бюджет урындары өҫтәлгән: «актёрлыҡ сәнғәте» һөнәренә – ике урын һәм һынлы сәнғәт факультетында дүрт өҫтәмә урын барлыҡҡа килгән. Уҡыу йортондағы дөйөм урындар һаны – 105. Фото:bashinform.ru