Республика йортонда Башҡортостан Башлығы Радий Хәбиров сираттағы “Инвестиция сәғәте”н үткәрҙе. Унда сәнәғәт һәм хеҙмәтләндереү өлкәһендә яңы башланғыстар ҡаралды. Төбәк биләмәһендә импортты алмаштырыусы күләмле проектты “Химинвест” компанияһы тормошҡа ашырырға планлаштыра. Уның генераль директоры Сергей Медведев Салауат яһалма полимерҙар заводын – үҫемлек сеймалынан целлюлоза нитраттары, шулай уҡ анилин етештереү буйынса производство комплексын төҙөү ниәте тураһында һөйләне. Был продукцияны Рәсәйҙә етештермәйҙәр әле. Әммә ул сәнәғәттең төрлө тармаҡтарында, шул иҫәптән полиграфия, медицина һәм автомобиль эшләүҙә талап ителә. Инновация проектын бер нисә этапта тормошҡа ашырырға планлаштыралар. Инвестицияларҙың дөйөм күләме - яҡынса 54 миллиард һум. Проектты тормошҡа ашырғанда заводта 500-ҙән ашыу белгес эшләйәсәк. Производство комплексы майҙансығында шулай уҡ полимерҙарҙы тикшереү һәм эшләү үҙәге, профилле юғары уҡыу йорттары студенттары һәм аспиранттары өсөн тәжрибә-лаборатория һәм фәнни-технологик база барлыҡҡа киләсәк. Фекер алышыу йомғаҡтары буйынса проект һалым преференциялары менән өҫтөнлөклө статус ала. Ә Киләсәктә Салауат яһалма полимерҙар заводы “Алға” махсус иҡтисади зонаһы резиденттары иҫәбенә инә аласаҡ. *** “Инвестиция сәғәте”ндә шулай уҡ Өфө районында электротехник изделиелар өсөн сәнәғәт корпустары етештереү буйынса “ЭлКом” компанияһының икенсе сираттағы заводын төҙөү проектын ҡаранылар. Хәтерегеҙгә төшөрәбеҙ, 2020 йылдың декабрендә Радий Хәбиров видеобәйләнеш тәртибендә был предприятиены асыуҙа ҡатнашты. Заводты төҙөү проекты – төбәктең Инвестиция комитеты хуплаған тәүге башланғыстар иҫәбендә. “ЭлКом” компанияһының генераль директоры Илшат Шәйхетдинов “Инвестиция сәғәте”ндә производствоны киңәйтеүгә 650 миллион һумдан ашыу аҡса һалырға ниәтләүҙәре хаҡында һөйләне. 2024 йылдың икенсе кварталы аҙағында бында яңы майҙансыҡты сафҡа индереү 215 эш урыны булдырырға мөмкинлек бирәсәк. Фекер алышыу йомғаҡтары буйынса проектҡа һалым льготалары менән өҫтөнлөклө статус бирелде. *** Өфөлә “Ҡала пары” мунса комплексын төҙөү пландары тураһында “Аврора” компанияһының генераль директоры Альянс Алнадави һөйләне. Инвестор Рәсәйҙең ҙур ҡалаларында бер нисә ошондай уҡ проектты тормошҡа ашырған да инде. 2028 йылдың аҙағына тиклем Башҡортостандың баш ҡалаһында төҙөләсәк 3 мең квадрат метр майҙанлы комплекс – компанияның инвестициялар күләме буйынса иң ҙур проект. Уны төҙөүгә 600 миллион һум йүнәлтеләсәк, 100 эш урыны булдырыласаҡ. Ярҙам саралары сифатында Инвестиция комитеты проектҡа һалым льготалары биреү һәм инженер һәм транспорт инфраструктураһына сығымдарҙың бер өлөшөн ҡаплау менән өҫтөнлөклө статус бирә. Өфө хакимиәте шулай уҡ инвесторға мунса комплексын төҙөү өсөн ер участкаһын һайлап алыуҙа һәм рәсмиләштереүҙә булышлыҡ итәсәк. Фотолар: Башҡортостан Республикаһы Башлығының матбуғат хеҙмәтенән.