Փետրվարի 22-ին Ֆրանսիայից Հայաստան կառաքվեն Thalès-ի երեք Ground Master (GM200) ռադարները, որոնք թույլ կտան հայտնաբերել թշնամու ինքնաթիռը 250 կմ հեռավորության վրա, ինչպես նաև Safran ընկերության կողմից արտադրված գիշերային տեսողության սարքեր և հեռադիտակներ, հայտնել է Le Figaro-ն։ Լրատվականը հիշեցրել է, որ Ֆրանսիան և Հայաստանը համապատասխան համաձայնագիրը ստորագրել են 2023 թվականի հոկտեմբերին։
Le Figaro-ն պարզաբանել է, որ Փարիզը 2024 թվականին երեք լեռնային մարտական դասընթացներ կանցկացնի հայ զինվորականների համար։
Լրատվականն այս նյութը հրապարակել է փետրվարի 22-23-ը Ֆրանսիայի զինված ուժերի նախարար Սեբաստիան Լեկորնուի Հայաստան կատարելիք այցի նախօրեին՝ «նախատեսված երկու երկրների միջև պաշտպանական հարաբերություններն ամրապնդելու համար»։
«Ֆրանսիան և Հայաստանը պատմականորեն ունեցել են բարեկամական հարաբերություններ, սակայն պաշտպանության ոլորտում համագործակցությունն այնքան էլ ինտենսիվ չի եղել»,- մեջբերել է Le Figaro-ն Ֆրանսիայի Զինված ուժերի նախարարությանը, որը նաև ընդգծում է, որ սա Ֆրանսիայի պաշտպանության նախարարի առաջին այցն է Հայաստան։
