Бөгөн Өфөләге “Башҡортостан” дәүләт концерт залында Ватанды һаҡлаусылар көнөнә арналған тантаналы йыйылыш үтте. Залдағы хәрби кейемдәге кешеләрҙән күҙ ҡамаша ине: махсус хәрби операция яугирҙәре һәм ветерандары, Рәсәй Геройҙары, запастағы офицерҙар, ҡаһарманлыҡ күрһәткән ир-аттар, һәләк булған яугирҙәрҙең ғаилә ағзалары... Йыйылыусыларҙы Башҡортостан Башлығы Радий Хәбиров тәбрикләне. Уның әйтеүенсә, бөгөн традицион ир-аттар байрамы яңы айырым бер мәғәнә ала. Барлыҡ Ватанды һаҡлаусылар: алғы һыҙыҡта ҡаһарманлыҡ күрһәткән яугирҙәр ҙә, тылда “Бөтәһе лә Еңеү өсөн!” тигән девиз менән эшләгәндәрҙең дә берләшеүе символына әйләнә. – Ҡулдарына ҡорал тотоп Тыуған илебеҙ һағына торған яҡташтарыбыҙ менән ғорурланабыҙ. Араларында тыныс һөнәр эйәләре – уҡытыусылар, инженерҙар, водителдәр, ауыл хужалығы эшсәндәре, шулай уҡ етәкселәр, депутаттар, дәүләт хеҙмәткәрҙәре, журналистар ҙа бар, – тине ул. Радий Фәрит улы хеҙмәттәштәребеҙ, билдәле журналистар Рафиҡ Әхмәтшин менән Бәйтулла Фәтҡуллинды билдәләне. Улар тәүҙә махсус хәрби операция биләмәһенә барып, алғы һыҙыҡтан репортаждар эшләне, ә ундағы хәлдәрҙе, дошмандың мәкерлеген үҙ күҙҙәре менән күргәс, ҡулдарына ҡорал алырға булалар. Шулай уҡ Радий Хәбиров Луганск һәм Донецк халыҡ республикаларында эшләгән табиптар, шәфҡәт туташтары менән ғорурланыу тураһында әйтте. Улар алғы һыҙыҡта яугирҙәрҙең ғүмерҙәрен ҡотҡара. Ғөмүмән, Башҡортостан егеттәре - доброволецтар, контрактсылар һәм мобилизацияланғандар үҙҙәрен бик ҡыйыу итеп күрһәтә, дөйөм еңеүгә ҙур өлөш индерә. Радий Хәбиров беҙҙең яугирҙәрҙең батырлыҡтарын һанап китте. – Беҙҙең халыҡ өсөн 23 февраль - мөһим көн. Тап ошо көндә 1943 йылда Донбасста легендар генерал, Рәсәй Геройы Миңлеғәле Шайморатов Тыуған иле өсөн үҙ ғүмерен ҡорбан иткән. Ватанды һаҡлаусылар көнөндә хәрби бурысына аҙағына тиклем тоғро ҡалған һәм батырҙарса һәләк булған бөтәһен дә хәтерләйбеҙ. Уларҙың исемдәрен мәктәптәр, аллеялар, урамдар йөрөтә, Улар һәр саҡ беҙҙең йөрәктә ҡаласаҡ, – тине Радий Фәрит улы. Йыйылышта ҡатнашыусылар бер минутҡа тын ҡалып уларҙы иҫкә алды. Республика етәксеһе белдереүенсә, Башҡортостан фронтты тәьмин итеүҙә әүҙем ҡатнаша. Республиканың оборона предприятиелары етештереү күләмен бер нисә тапҡырға арттырҙы. Аҙна һайын махсус хәрби операция зонаһына гуманитар конвойҙар ебәрелә, улар йөҙҙән артты. Республика халҡы маскировкалау селтәрҙәре, окоп шәмдәре әҙерләй, йылы ойоҡ, бейәләй бәйләй, посылкалар ебәрә. Уҡыусылар яугирҙәргә йылы хаттар яҙа. Башлыҡ тылда яугирҙәрҙең ғаиләләренә күрһәтелгән хәстәрлек тураһында һөйләне. Сығышы һуңында Башҡортостан Башлығы генерал Шайморатов орден һәм миҙалдарын тапшырҙы. Шайморатов орденына үлгәндән һуң Бөйөк Ватан һуғышы ветераны Александр Семенович Ишкилдин лайыҡ булды. Юғары награданы уның улы, скульптор, Рәсәйҙең халыҡ рәссамы Салауат Щербаков алды һәм атаһы Шайморатов ордены менән ғорурланыр ине тип билдәләне. Шулай уҡ батырлыҡ күрһәткән хәрбиҙәр, һәләк булғандарының ҡатындары, тылда эш алып барған кешеләр бүләкләнде. Сара һуңында байрам концерты күрһәтелде. Унда хәрби һәм популяр йырҙар яңғыраны, дәртле бейеүҙәр ҡуйылды. Фото: Башинформ.