“Башҡортостан” гәзитенең "Бәйләнештә" селтәрендә 23 февраль – Ватанды һаҡлаусылар көнө һәм Ғаилә йылы айҡанлы ойошторолған “Өлгөлө атай” конкурсы тамам. Ун көн дауамында республикабыҙҙың район-ҡалаларында күп бала тәрбиәләгән, өлгөлө ғаилә башлығы булған, йәмәғәт эшендә әүҙем ҡатнашҡан иң яҡшы атайҙар үҙ-ара көрәште. Уларҙың һәр береһе был тормошта еңеүсе, сөнки барыһы ла ныҡлы ғаилә ҡорған, йорт һалған, иң мөһиме – “атай” тигән бөйөк исемде лайыҡ йөрөтәләр, илебеҙҙең киләсәген үҫтерәләр. Бәйге булғас, еңеүсеһе лә була. Шулай итеп, “Башҡортостан” гәзитенең “ӨЛГӨЛӨ АТАЙ” конкурсында иң күп тауыш йыйып, https://vk.com/app7198399_-104965500#poll65ca28bdc85f9504436c6b71 I урынды – Ленар Яримов II урынды – Зәбир Баһауетдинов III урынды - Сибай Утарбаев яуланы. Ҡотлайбыҙ! Был конкурста ҡатнашҡан иң күп балалы ғаилә башлығы – Бөрйән районынан 11 бала атаһы Ишкилде Фәхрийәновты (4-се урын) “Рухлы атай” номинацияһы менән билдәләргә ҡарар иттек. Уға яҡташтары бик күп матур, изге һүҙҙәрҙән торған комментарийҙар яҙҙы. Уларҙан беҙ Ишкилденең ни тиклем абруйлы, хөрмәтле ир уҙаманы, ғаиләһендә яҡшы атай, хәстәрлекле тормош иптәше, ғөмүмән еңеүгә лайыҡлы икәнлеге тураһында белдек. Конкурс шарттарына ярашлы, еңеүселәр хаҡында "Башҡортостан" гәзите биттәрендә ҙур мәҡәлә донъя күрәсәк, дипломдар менән бүләкләнәсәк. Барлыҡ атайҙарҙы, ир-егеттәрҙе Ватанды һаҡлаусылар көнө менән ихлас күңелдән ҡотлайбыҙ! Ғаиләләрегеҙ ныҡ булһын, балаларығыҙ һәр саҡ һеҙҙе ҡыуандырып торһон, ҡатындарығыҙ менән тиң тормошта шатлыҡтарға төрөнөп йәшәргә Хоҙай насип итһен! Байрам менән!