Хәйбулла районында тыуып-үҫкән Евгений Цветковты яҙмыш Әбйәлил районының Бикҡол ауылына алып килә. Бында ул ҡатыны Зөлфиә Фәйзрахман ҡыҙы менән өс бала үҫтерә. Улы Артем махсус хәрби операцияла ҡатнашҡас, атаһы ла улы артынан яуға юллана - 2023 йылдың декабрендә МХО-ға китә. Үкенескә күрә, 18 ғинуарҙа Евгений вафат була. Шуныһы үкенесле, Бибиниса Цветкованың дүрт балаһы ла мәрхүм хәҙер. Батыр яугирҙе Бикҡол ауылында һуңғы юлға оҙаталар. Әммә Хәйбулла халҡы ла үҙҙәренең ҡаһарман яҡташтарын онотмай. Кисә Асҡарҙа үткән "Ҡатын-ҡыҙҙың бәхет биләмәһе" сараһында Хәйбулла районы хакимиәте башлығының социаль мәсьәләләр буйынса урынбаҫары Роза Рәсембәтова шәхсән Евгений Цветковтың әсәһе, ҡатыны һәм ҡыҙы менән осрашты. Уларҙың ауыр ҡайғыларын уртаҡлашты, ярҙам итәсәктәрен белдерҙе һәм Хәйбулла районынан алып килгән күстәнәстәрен тапшырҙы. "Яҙмыш еле ҡайҙа ғына ташлаһа ла, яҡташтарыбыҙҙы беҙ бер ҡасан да оноторға тейеш түгелбеҙ. Бигерәк тә беҙҙең тыныс тормошобоҙ өсөн ғүмерҙәрен биргән батырҙарҙы. Артабан да Евгений Цветковтың ғаиләһе менән һәр саҡ бәйләнештә буласаҡбыҙ, ярҙам кәрәкһә, беҙ һәр саҡ әҙербеҙ", - тине Роза Раузат ҡыҙы. Әйткәндәй, Евгений Цветковтың улы Артемдың ошо көндәрҙә генә өсөнсө сабыйы тыуған. Олатаһын күрә алмаһа ла, уның батыр булыуын белеп үҫәсәк, ти өләсәһе. Яугирҙең ҡыҙы Аэлита 10-сы класта уҡый, әлегә ул әсәһе һәм өләсәһе өсөн иң ҙур таяныс, оло ярҙамсы ла. Бибиниса Цветковаға Дәүләт Йыйылышы - Ҡоролтай депутаты Гөлнур Ҡолһарина "Милләт әсәһе" миҙалын тапшырҙы. Автор фотоһы.