Бөгөн Башҡортостан Башлығы Радий Хәбиров рәйеслегендәге аҙналыҡ оператив кәңәшмәлә аҙыҡ-түлек һәм эшкәртеү сәнәғәте үҫеше тикшерелде. Республиканың вице-премьеры - ауыл хужалығы министры Илшат Фәзрахманов 2023 йылда тармаҡ предприятиеларының 160 миллиард һумлыҡ продукция һатҡанын хәбәр итте. Был 2022 йылғы күрһәткестән 6,5 процентҡа күберәк. Дөйөм алғанда, төбәктә аҙыҡ-түлек етештереү индексы – 100,1 процент, эсемлектәр 101,9 процент тәшкил иткән. Уҙған йылда сығарылыш күләменең артыуы бөтә төп позициялар буйынса тиерлек күҙәтелгән. Атап әйткәндә, республика һөт һәм һөт ризыҡтары (үҙ-үҙеңде тәьмин итеү - 121,6 процент), сусҡа (140 процент), һыйыр ите (108,1 процент) буйынса ихтыяждарын тулыһынса тәьмин итә. Шәкәр (6,7 тапҡырға) һәм үҫемлек майы (6,8 тапҡырға) сығарыу эске ихтыяждан күпкә артығыраҡ. Шулай уҡ картуф (149 процент), яңы ҡыяр (108 процент) һәм томат (152 процент) етештереү баҙар ихтыяжын тулыһынса ҡаплай. – Етештерелгән аҙыҡ-түлектең дөйөм күләме 2 миллион тонна тәшкил итте, йәғни 2022 йылға 111 процент, – тип билдәләне вице-премьер. Республикала ғәмәлдә булған дәүләт ярҙамы саралары ыңғай динамикаға булышлыҡ итте, тип аңлатты Илшат Фәзрахманов. 2023 йылда тармаҡҡа һөт эшкәртеүҙе стимуллаштырыуға 93 миллион һум самаһы аҡса йүнәлтелгән, 17 һөт заводы һатып алынған һөт буйынса сығымдарҙың бер өлөшөн ҡаплай алған. 84 ауыл хужалығы кооперативы пайсыларҙан сеймал һатып алыу һәм эшкәртеүҙе үҫтереү өсөн 212 миллион һумдан ашыу аҡса алды. Федераль министрлыҡтың яңы сараһы алты һөт заводында маркалау ҡорамалдарын һатып алыуға һалынған 40 миллион һумды компенсацияларға мөмкинлек биргән. Бынан тыш, 2022 йылдан республикала Аҙыҡ-түлек тармағын үҫтереү программаһы ғәмәлгә ашырыла. Төбәк бюджеты средстволары иҫәбенә аҙыҡ-түлек етештереүселәр ҡорамалдарҙы һәм техниканы яңыртыуға сығымдарҙың 40 процентын субсидиялай ала. Ике йыл эсендә был сара 100-ҙән ашыу производствоны яңыртырға мөмкинлек бирҙе. Башлыса был технологик ҡорамалдар, һыуытҡыс камералар, махсус автотранспорт, маркировкалау өсөн ҡорамалдар. – 2022-2023 йылдарҙа эшкәртеү ҡеүәттәрен яңыртыуға 150 миллион һум йүнәлтелде. Бөтәһе 405 миллион һумға 350 берәмектән ашыу техника һәм ҡорамал һатып алынды, – тине Илшат Фәзрахманов. – Хужалыҡ итеүҙең кесе формалары араһындағы ихтыяжды иҫәпкә алып, 2024 йылда был йүнәлеште дауам итербеҙ. Республика ҡаҙнаһында ошо маҡсатҡа 100 миллион һум ҡаралған. Биш йылда аҙаҡҡы аҙыҡ-түлек продукцияһын етештереү күләме байтаҡҡа артты, тип өҫтәне вице-премьер. Республикала 12 ҙур проект тормошҡа ашырылды, уларға 8 миллиард һум самаһы инвестиция һалынды. Планлаштырыу йәки ғәмәлгә ашырыу этабында - дөйөм һалыу күләме 24,5 миллиард һумға тиклем 26 проект. Республиканың агросәнәғәт комплексы предприятиелары ҙур экспорт ҡеүәтенә эйә. 2023 йыл йомғаҡтары буйынса сығарылған продукция күләме 79 процентҡа артҡан һәм 750 мең тонна самаһы тәшкил иткән. Санкцияларға һәм халыҡ-ара иҫәп-хисап үткәреүҙә ҡатмарлыҡтарға ҡарамаҫтан, Башҡортостан донъяның 44 иленә ауыл хужалығы продукцияһын оҙата. Йыл һайын агросәнәғәт комплексы продукцияһын экспортлаусы предприятиелар һаны арта, бөгөн улар - 106. Экспортҡа оҙатылған продукция төрлө – колбаса һәм кондитер изделиеларынан алып традицион иген, май орлоҡтарына, шәкәргә, һөт һәм май продукцияһына тиклем. - Темптар бар, үҫеш бара, ләкин әүҙемерәк башларға кәрәк. Өҫтәмә 11 процент - яҡшы һөҙөмтә, ләкин артабан алға барырға кәрәк, - тип йомғаҡ яһаны Башҡортостан Башлығы Радий Хәбиров. Фото: Башҡортостан Башлығы сайты.