Бөгөн аҙналыҡ оператив кәңәшмәлә Башҡортостан Башлығы Радий Хәбиров биатлон буйынса республика йыйылма командаһы вәкилдәренә дәүләт наградалары тапшырҙы. 9 февралдән 18-енә тиклем ҡышҡы спорт төрҙәре буйынса Бөтә Рәсәй спартакиадаһы уҙҙы, тип иҫкә төшөрҙө төбәк етәксеһе. Башҡортостандан унда 11 спорт төрө буйынса 100-ҙән ашыу спортсы ҡатнашты. Улар бөтәһе төрлө дәрәжәләге 17 миҙал яуланы – дүрт алтын, дүрт көмөш һәм туғыҙ бронза. Башҡортостандың биатлон буйынса йыйылма командаһы юғары спорт һөҙөмтәләре күрһәтте һәм туғандаш Беларусь спортсыларына дуҫтарса мөнәсәбәт күрһәтте. Эстафетала Башҡортостан биатлонсылары – дүртенсе, ә зачетһыҙ сығыш яһаған Беларусь командаһы өсөнсө булды. Ярыштар ҡағиҙәләре буйынса бронза миҙалдарҙы Башҡортостан спортсылары алды. Ләкин улар награданы белорустарға бирергә ҡарар иткән. – Һеҙ барыһын да дөрөҫ эшләнегеҙ. Хәҙерге донъя шулай йәшәргә, белорус туғандар менән мөнәсәбәттәребеҙ шулай ҡоролорға тейеш тә, – тине Радий Хәбиров. – Әммә өсөнсө урын барыбер һеҙҙә ҡала, һәм миҙалдарығыҙҙы һеҙ аласаҡһығыҙ. Башҡортостан Башлығы Халыҡтар дуҫлығы орденын биатлон буйынса республика йыйылмаһының баш тренеры, Рәсәйҙең атҡаҙанған тренеры Виктор Никитинға тапшырҙы. Рәсәйҙең атҡаҙанған спорт мастеры Антон Бабиков һәм Рәсәйҙең спорт мастеры Александр Бабчин Башҡортостандың Почёт грамотаһы менән бүләкләнде. Рәсәйҙең спорт мастеры Илья Бурлаков республика Башлығының Рәхмәт хаты менән билдәләнде. Фото: Башҡортостан Башлығы сайты.