Быйыл Рәсәй Президенты Владимир Путин 29 февралдә Рәсәй Федерацияһының Федераль Йыйылышына йыллыҡ Мөрәжәғәтнамә менән сығыш яһай. Был хаҡта Кремлдең рәсми сайтында хәбәр ителә. Был ваҡиғаны илебеҙ халҡы көтөп ала һәм иғтибар менән күҙәтә. Былтыр Мөрәжәғәтнамә 21 февралдә булғайны, ә 2022 йылда булманы. Дәүләт Думаһы депутаттарына һәм Федерация Советы ағзаларына илдәге эштәр торошо, эске һәм тышҡы сәйәсәттең төп йүнәлештәре тураһында йыллыҡ мөрәжәғәтнамәләр менән мөрәжәғәт итеү – президент вәкәләттәренең береһе, ул Конституцияның 84-се статьяһында яҙылған. Мөрәжәғәтнамә – яҡын киләсәккә Рәсәй үҫешенең стратегик йүнәлештәрен күреүҙе сағылдырған программалы сәйәси-хоҡуҡи документ. Ул сәйәси, иҡтисади, идеологик положениеларҙы, шулай уҡ Федераль Йыйылыштың ике палатаһының да закондар сығарыу эше буйынса аныҡ тәҡдимдәрҙе үҙ эсенә ала. Йола буйынса сарала сенаторҙар, Дәүләт Думаһы депутаттары, Хөкүмәт ағзалары, Конституция һәм Юғары судтар етәкселәре, губернаторҙар корпусы, ил субъекттарының закондар сығарыу йыйылышы рәйестәре, традицион конфессиялар башлыҡтары, йәмәғәт эшмәкәрҙәре, шул иҫәптән төбәк йәмәғәт палаталары етәкселәре, ҙур киң мәғлүмәт сараларының баш мөхәррирҙәре ҡатнаша. Фото: kremlin.ru