Биш километрҙан ашыу Өфө – Шишмә юлы төҙөкләндерелә

Башҡортостанда 2024 йылда “Хәүефһеҙ сифатлы юлдар” милли проекты сиктәрендә Өфө-Шишмә трассаһының биш километрҙан ашыулыҡ участкаһы ремонтлана. Юлсылар ике участканы норматив хәлгә килтерергә ниәтләй. Эштәр Нижегородка ауылы янындағы тимер юл аша күперҙән Таптыҡ ауылына тиклем башҡарыласаҡ. Был участкаларҙы ремонтлауға 127,8 миллион һум йүнәлтеү планлаштырыла. – Был юл Башҡортостандың баш ҡалаһы, Өфө һәм Шишмә райондары араһында транспорт бәйләнешен тәьмин итә. Бында муниципаль-ара маршруттар йөрөй. Шуға күрә был юлды ремонтлау мөһим, – тине Башҡортостан Республикаһының транспорт һәм юл хужалығы министры Александр Клебанов. 2024 йылдың башына Өфө – Шишмә юлының 67,8 проценты норматив торошта. Был участканы төҙөкләндергәндән һуң нормативтарға был юлдың 81,82 проценты тап киләсәк. Подрядсы ойошма ремонт эштәрен май-июнь айҙарында башларға ниәтләй. Барлыҡ эштәрҙе 2024 йылдың аҙағына тиклем башҡарыу күҙаллана. “Хәүефһеҙ сифатлы юлдар” милли проекты (национальный проект “Безопасные качественные дороги”) “2030 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында” ил Президенты Владимир Путиндың Указы положениеларын үтәү өсөн Рәсәйҙең Транспорт министрлығы тарафынан әҙерләнгән. Милли проекттың масштабы бөтә илде солғап ала, унда Рәсәйҙең 84 субъекты ҡатнаша. Фото: Транспорт һәм юл хужалығы министрлығы.