Маҡсат – ғәҙел донъя төҙөү өсөн көстәрҙе берләштереү

«Берҙәм Рәсәй» партияһы I Халыҡ-ара «Милләттәр азатлығы өсөн!» колониализмдың хәҙерге практикаһы менән көрәшеү яҡлылар форумын үткәрҙе. Унда Африка, Азия, Яҡын Көнсығыш, Латин Америкаһы, Европа һәм БДБ илдәренең алдынғы сәйәси көстәре вәкилдәре йыйылды. Форумда ҡатнашыусыларға сәләмләү һүҙендә Рәсәй Президенты Владимир Путин уны үткәреү башланғысының «бик мөһим» булыуын билдәләне. «Илебеҙ колониаль системаның нигеҙҙәрен юҡҡа сығарыу, милли-азатлыҡ хәрәкәттәренә булышлыҡ итеү өсөн күп эшләне. Йәш бойондороҡһоҙ дәүләттәргә именлекте тәьмин итеүҙә, иҡтисадты аяҡҡа баҫтырыуҙа, киҫкен социаль, гуманитар проблемаларҙы хәл итеүҙә етди ярҙам күрһәтте. Бөгөн беҙ ысын азатлыҡ һәм ғәҙеллек, бөтә илдәр һәм халыҡтар өсөн прогресс өсөн көрәштә көстө берләштерергә әҙербеҙ. Уның нигеҙендә халыҡ-ара хоҡуҡ, бер-беребеҙҙең законлы мәнфәғәттәрен ихтирам итеү принциптары, үҙ-ара ышаныс һәм ижади хеҙмәттәшлек ята», - тип һыҙыҡ өҫтөнә алды Рәсәй Президенты. «Берҙәм Рәсәй» рәйесе Дмитрий Медведев форумда ҡатнашыусыларҙы халыҡтарҙың берҙәмлеге, кешелек яҙмышына, уның тулы үҫешенә битараф булмау берләштерә тип билдәләне. «Быға тиклем коллектив Көнбайыш тәкәббер рәүештә Азия, Яҡын Көнсығыш, Африка һәм Латин Америкаһы илдәрен «өсөнсө донъя» тип атаны. Ләкин бөгөн был концепция юҡҡа сыҡты. Һәм был илдәр, йылдам үҫешеп, дәүләттәрҙең үҙаллы тигеҙлеге һәм цивилизациялы күп төрлөлөк принциптарын ғәмәлгә ашырыу, неоколониализм күренештәренән тулыһынса баш тартыу өсөн сығыш яһай», - тине ул. Украиналағы хәлде Дмитрий Медведев Көнбайыштың яуапһыҙ эш итеү миҫалы тип атаны. Уның һүҙҙәренсә, уны коллектив Көнбайыш Рәсәйгә ҡаршы һуҡыр ҡорал итеп файҙалана. Ул шулай уҡ Берләшкән Милләттәр Ойошмаһының Генераль Ассамблеяһында 14 декабрҙә Колониализм ҡорбандарын иҫкә алыу көнөн булдырыу мөмкинлеген ҡарарға тәҡдим итте. 1960 йылда ошо көндә Колониаль илдәргә һәм халыҡтарға бойондороҡһоҙлоҡ биреү тураһында декларация ҡабул ителгән. «Берҙәм Рәсәй»ҙең халыҡ-ара хеҙмәттәшлек буйынса комиссияһы башлығы, сит ил эштәре министры Сергей Лавров һүҙҙәренсә, Рәсәй элек тә деколонизация процестарын үҫтереүҙә алдынғы булған. Әле лә «Милләттәр азатлығы өсөн!» форумы ғәҙәти булмаған тәжрибәләрҙе бөтөрөү өсөн мөһим. Берләшкән Милләттәр Ойошмаһы Уставының ғәҙеллеген һәм нормаларын яҡлау өсөн «Берҙәм Рәсәй» Рәсәй Дуҫтар клубын да ойошторҙо. Сит ил дәүләттәре сәйәсмәндәре «Берҙәм Рәсәй»гә форумды үткәреү инициативаһы өсөн рәхмәт белдерҙе. - «Берҙәм Рәсәй» партияһы башланғысы менән Мәскәүҙә 14 февралдән 16-һына тиклем «Милләттәр азатлығы өсөн!» форумы үтте, ул Рәсәйҙең неоколониализмға ҡаршы әүҙем көрәшсе булараҡ ролен һыҙыҡ өҫтөнә алды. Унда донъяның 55 иленән делегацияның ҡатнашыуы бөгөнгө заманда колонияларға ҡаршы көрәштең мөһим булыуын һәм ҙур һорау менән ҡулланылыуын сағылдыра. Рәсәй һәр ваҡыт милли-азатлыҡ хәрәкәттәренә ярҙам итеүҙә айырым роль уйнаны. Ул һәр ваҡыт Латин Америкаһынан алып Африка һәм Азия халыҡтарына тиклем халыҡтарҙың үҙбилдәләнешкә һәм ирекле үҫешкә хоҡуғы өсөн һәр ваҡыт сығыш яһай. Форум азатлыҡ һәм үҙбилдәләнеш өсөн көрәшселәр араһында диалог һәм тәжрибә уртаҡлашыу өсөн мөһим майҙансыҡҡа әүерелде, тип иҫәпләйем. Ул XXI быуатта, ниндәй генә хәлдә булыуына ҡарамаҫтан, колониализмға урын юҡлығын күрһәтте. Форумдың маҡсаты – ғәҙел донъя төҙөү өсөн көстәрҙе берләштереү, - тип ваҡиғаға аңлатма бирҙе Башҡортостан Республикаһы Дәүләт Йыйылышы – Ҡоролтай рәйесе, «Берҙәм Рәсәй» партияһының төбәк бүлексәһе секретарының беренсе урынбаҫары Константин Борисович Толкачев.