Тавык күбрәк йомырка салсын өчен кышын нәрсә ашатырга? Моның өчен төп ике шартның үтәлүе кирәк.
Тавык күбрәк йомырка салсын өчен кышын нәрсә ашатырга? Моның өчен төп ике шартның үтәлүе кирәк. Беренчедән, кетәклекнең җылы, каралган булуы, икенчедән, кош-кортның яхшы ашавы.
Татарстанда яшәүче Әлфинур Нәҗметдинова мәсәлән, тавыкларын көненә ике тапкыр ашата. Иртән табыннан калган ризыклар – икмәк, ботка, яшелчә (бәрәңге, кишер, чөгендер) һ.б. бирә. Ара-тирә болгаткан белән сыйлый. Болгатканны вакланган кабырчыкка (ракушка) ылыс оны, печән һәм акбурга су кушып ясый. Кышын тавык ризыгына бераз гына чүпрә өстәсәң әйбәт, ди. Чүпрә кош-кортның гәүдә авырлыгын арттыра, шулай ук йомырка салуын яхшырта икән. Иммунитетын да ныгыта. Әмма артыгы ярамый. Тавыкның көндәлек ризык күләменең нибары 4-5 процентын гына тәшкил итәргә тиеш. Инде килеп, көн саен суларын алыштырып торырга кирәк. Кичен биш литрлы савытка краннан су тутырып куя да иртән савытларына чыгарып сала. Тавыкларны төрле чирләрдән саклау өчен балык калдыклары, балык мае, сөяк оны биргәли.
Шулай ук тавыкларына көрпә, үрдерелгән ашлык ашатуны хуп күрә. Үрдерелгәнендә кошлар өчен витаминнар һәм минераллар күп. Ә инде иң әһәмиятлесе – кышын да кош-кортны суалчан-челидән өзми. Иренмәс җан боларын балыкчылар кибетеннән сатып ала.
Тавыклары җылытылган кетәклектә яши. Сайгак идәненә агач чүбе һәм печән түши. Асларын көн саен чистартып, алыштырып тора. Кышын тавыкка тәүлегенә кимендә 15 сәгать яктылык кирәк, бу очракта күкәй салуы 20 процент чамасы арта икән. Мәйданы 6 кв. м тәшкил иткән кетәклеккә 60 кВтлы лампочка булса, шул җитә. Зур бер лампочка урынына кечерәк ике лампочканың януы яхшырак ди.