Баймаҡ районының Үрге Яйыҡбай ауылы "Айыҡ ауыл" республика конкурсы сиктәрендә маҡсатлы эш алып бара. Бында көн дә тиерлек айыҡ һәм сәләмәт тормошто, спортты, милли уйындарыбыҙҙы, мәҙәниәтебеҙҙе, милли аш-һыуҙарыбыҙҙы пропагандалаған төрлө саралар гөрләп үтеп тора. Бынан тыш, ғаилә, йәмәғәт ойошмаларының статусын үҫтереү буйынса район кимәлендә йыйындар үткәрелеп, ошо юҫыҡтағы көнүҙәк мәсьәләләр уртаға һалып тикшерелде. "Мәргән уҡсы" ярышы "Айыҡ ауыл" конкурсына ярашлы икенсе тапҡыр ойошторола. Милли йәйәнән уҡ атыу асыҡ турнирында Рәсәйҙең һәм Башҡортостандың төрлө төбәктәренән уҡсылар ҡатнашты. Быйылғы ҡышҡы миҙгелдә беренсе тапҡыр асыҡ һауала үткән ярышҡа Баймаҡ, Бөрйән, Әбйәлил, Белорет, Учалы, Ейәнсура, Өфө райондарынан, Өфө, Белорет, Баймаҡ, Сибай ҡалаларынан, шулай уҡ күрше Силәбе өлкәһенән 40-ҡа яҡын мәргәнлекте һөйөүсе йыйылды.Ярыштың ҡағиҙәләре буйынса квалификация этабында дүрт төрлө сәпкә 18 метрҙан алып 40 метрға тиклемге алыҫлыҡтан аттылар. Ошо сәптәрҙе атып иң күп мәрәй йыйыусы һигеҙ уҡсы финал этабына сыға һәм артабан призлы урындар өсөн көс һынаша. Бик көсөргәнешле атыштарҙан һуң беҙҙең урындар түбәндәгесә билдәләнде.Ҡатын-ҡыҙҙар араһында:Ишморатова Әлиә;Ишкилдина Нәйлә;Норотҡолова Илүзә (барыһы ла Бөрйән районынан).Ир-егеттәр араһында:Низаметдинов Рәис (Өфө ҡалаһы);Юлдашбаев Фәрит (Өфө районы;Юлбирҙин Даян (Бөрйән районы)."Ибраһимов Илдус, Әлимханова Гөлшат, Мырҙағәлина Фәнүзә тәҡдим иткән махсус бүләктәрҙе Багаув Рөстәм, Зыкрина Гөлнара, Ғәлиуллина Айгөл отоп алды.Иң алыҫтан килгән Силәбе ҡалаһынан Әлимханова Гөлшатҡа Үрге Яйыҡбай ауылы исеменән иҫтәлекле бүләктәр тапшырылды.Ярышты ойоштороуҙа ярҙам күрһәтеүсе клуб, мәктәп коллективына, беренсе класс уҡыусыларына, ауыл йәштәренә, ир-егеттәренә, тәмле аштар менән һыйлаусы ашнаҡсыларға, Ниғәмәт ауылы биләмәһе башлығына, Баймаҡ ҡалаһы һәм районының физик культура һәм спорт бүлегенә оло рәхмәтебеҙҙе еткерәбеҙ", - тип яҙа Үрге Яйыҡбай ауылы клубы етәксеһе Вәлимә Вәлиева. Фото: "Баймаҡ уҡсылары" төркөмөнән.