Ҡариҙел районының Ҡыҙыл Үреш ауылында, “Һаулыҡ һаҡлау” милли проектының тәүге звеноны яңыртыу программаһына ярашлы, дөйөм практика табибы бүлексәһе асылды. Модулле бина район үҙәгенән 45 километр алыҫлыҡта урынлашҡан. Бында өс меңдән ашыу кешене хеҙмәтләндерәсәктәр. Медицина учреждениеһын тантаналы шарттарҙа асыу көнөндә ауылдаштарҙы байрам менән ҡотларға Ҡулланыусылар хоҡуҡтарын һәм кеше именлеген һаҡлау өлкәһендә күҙәтеү буйынса федераль хеҙмәттең Башҡортостан буйынса идаралығы етәксеһе Анна Казак, Ҡариҙел районы хакимиәте башлығы Айҙар Шәйҙуллин һәм район дауаханаһының баш табибы Юнир Ғәлин ҡатнашты. Яңы бинала диспансерлаштырыу үтергә, стоматолог хеҙмәтенән файҙаланырға, дарыу препараттарына льготалы рецепттар алырға мөмкин. Медицина учреждениеһы заманса ҡорамалдар менән йыһазландырылған. –Дөйөм практика табибы бүлексәһе халыҡҡа медицина ярҙамын сифатлыраҡ итәсәк. Йәшәгән урынға яҡын булыуы пациенттар өсөн бик уңайлы, айырыуса өлкәндәр һәм аҙ хәрәкәтләнеүсән кешеләр өсөн,– тине дауахананың баш табибы Юнир Ғәлин. Рәсәй Президенты Владимир Путиндың “май“ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Ҡариҙел үҙәк район дауаханаһы сайты.