Өфөлә яңы физкультура-һауыҡтырыу комплексы асылды

Бөгөн Өфөлә Башҡортостан Башлығы Радий Хәбиров бассейны, боҙ һырғалағы һәм универсаль залы булған яңы физкультура-һауыҡтырыу комплексын асыу тантанаһында ҡатнашты. “Газпром – балаларға” программаһы буйынса төҙөлгән спорт ҡоролмаһы республиканың билдәле йәмәғәт һәм сәйәсәт эшмәкәре Өлфәт Мостафин хөрмәтенә аталды. Тантаналы сара "Газпром"ға нигеҙ һалыныу көнөнә тап килде. Унда шулай уҡ Рәсәй Дәүләт Думаһы депутаты, өс тапҡыр Олимпия чемпионы Ирина Роднина, Рәсәй Спорт көрәше федерацияһы президенты, Олимпия чемпионы Михаил Мамиашвили”КЭС-БАСКЕТ” мәктәп баскетбол лигаһының идара рәйесе, Олимпия чемпионы Светлана Антипова, “Газпром Трансгаз-Өфө”компанияһының генераль директоры Шамил Шәрипов һәм “Газпром”дың социаль инициативаларға ярҙам фондының генераль директоры Владимир Приймак, Өлфәт Мостафиндың туғандары һәм яҡындары, башҡа ҡунаҡтар ҡатнашты. Физкультура-һауыҡтырыу комплексы Менделеев урамында урынлашҡан. Унда бер сменала 208 кеше шөғөлләнә ала. Республика етәксеһе Радий Хәбиров бассейнды ҡараны, Башҡортостандың йөҙөү буйынса йыйылма командаһы ағзалары менән аралашты, рекордсменка Виктория Ширяева менән яңы бассейндағы беренсе йөҙөүгә старт бирҙе. Аҙаҡ боҙ аренаһында фигуралы шыуыусыларҙың сығыштарын ҡараны, универсаль залда булды, гимнастар менән аралашты һәм йәш спортсыларҙы, тренерҙарын иҫтәлекле сара менән ҡотланы. – бөгөн өфөлә, республикала бик мөһим ваҡиға булды. Балаларға һоҡланғыс спорт комплексын тапшырабыҙ, - тине ул. – Былар барыһы ла балалар көслө, һау булып үҫһен һәм, иң мөһиме, яҡшы кеше, бөйөк илебеҙҙең ысын граждандары булһын өсөн, - тине республика етәксеһе һәм “Газпром” компанияһы етәкселегенә рәхмәт һүҙҙәрен еткерҙе, Өлфәт Мостафинды хәтергә алды. Шуны биләдәләргә кәрәк: Киләсәк технологиялар форумында дәүләт Президенты спорт менән шөғөлләнеүселәргә яҡшы шарттар тыуҙырыу өсөн ошоға оҡшаш объеттарҙы төҙөү программаһын киңәйтеү бурысын ҡуйғайны. Өфөлә асылған яңы физкультура-һауыҡтырыу комплексы– ошо йүнәлештә эшләнгән ҙур аҙым. Мәғлүмәт, фотолар: glavarb.ru/rus/press_serv/novosti/175170.html