Әле “Башҡортостан” гәзитенең “Бәйләнештә” социаль төркөмөндә “Өлгөлө атай” конкурсы бара. Унда Салауат районының Лағыр ауылында йәшәгән Ғилман Мусин ҡатнаша. 2023 йылда үҙе – “Атай ҡаһарманлығы” билдәһе, ғаиләһе “Мөхәббәт һәм тоғролоҡ” миҙалы менән бүләкләнгән. Ҡатыны Фәрбизә Рәсүл ҡыҙы менән биш бала тәрбиәләп үҫтергәндәр, 11 ейәндәре бар. Ғилман Ғәрифулла улы Лағыр урта мәктәбенең география, һынлы сәнғәт һәм технология уҡытыусыһы булып эшләй. Уҡытыусы стажы 42 йыл, хеҙмәт юлын 1976 йылда башлаған. Ул Башҡортостан Республикаһының мәғариф отличнигы һәм хеҙмәт ветераны. Бик күп почет грамоталары, “Совет Ҡораллы көстәренең 90 йыллығы”, Совет офицерҙары Союзының Үҙәк советының “Хәрби антҡа тоғролоҡ өсөн” миҙалдары менән бүләкләнгән. Ғилман Мусин егеттәрҙе хәрби хеҙмәткә әҙерләүгә айырыуса ҙур иғтибар бүлә. Һуңғы биш йылда уның 19 уҡыусыһы “Йөрәк иҫләй” республика спорт фестивале, технология, география, һынлы сәнғәт буйынса муниципаль олимпиадалар, шулай уҡ “Зарница” республика хәрби-спорт уйынының зона этабы еңеүселәре булған. Ғилман Ғәрифулла улы ҡатыны, Башҡортостандың мәғариф алдынғыһы, педагогик хеҙмәт ветераны Фәрбизә Рәсүл ҡыҙы менән биш бала тәрбиәләп үҫтергәндәр һәм уларҙың һәр береһенә юғары белем алырға ярҙам итеп, оло тормош юлына сығарғандар. Мусиндар тормошонда балалары һәм ейәндәре иң ҡәҙерлеһе булып тора. Бөгөн улар 11 ейән-ейәнсәр шатлығын кисерә. Шуға ла Ғилман Ғәрифулла улы иң бай атайҙарҙың береһе тип ҡыйыу әйтә алабыҙ һәм был байлыҡ – уның балалары һәм ныҡлы таянысы, тоғро ҡатыны. Өлгөлө атай, яҡшы ғаилә башлығы Ғилман Мусин ысынлап та оло һоҡланыу тыуҙыра. Ғилман Ғәрифулла улы кеүек атайҙар үҫеп килгән быуын, йәштәр өсөн бөгөнгө заман геройы булырға тейеш. Фото: Ғилман Мусиндың ғаилә альбомынан.