Башҡортостан Рәсәй Президентын һайлауҙарға әҙерләнеүен дауам итә. ВЦИОМ-дың февраль айындағы һорауламаһы шуны күрһәтә: Рәсәй халҡының 85 проценты мөһим ваҡиға тураһында хәбәрҙар - 81 процент йылды ла, айҙы ла дөрөҫ атаған, 4 проценты йылды ғына әйтә алған. Бөгөн, 17 февралдә, республикала, шулай уҡ бөтә илдә, халыҡҡа мәғлүмәт биреү маҡсатынан, участка һайлау комиссиялары хеҙмәткәрҙәре өйҙән-өйгә йөрөп сығыу акцияһын башланы. Башҡортостанда һайлауҙарҙы күҙәтеү буйынса Йәмәғәт штабы эксперты Александр Кобыскан фекеренсә, “ИнформУИК” проекты әлегә тиклем үткәрелгән иң ҙур мәғлүмәт кампанияһы булып тора - Башҡортостанда ғына өйҙән-өйгә йөрөүҙә 11 меңдән ашыу кеше ҡатнашыры күҙаллана. - Был тәжрибә яңылыҡ түгел: Рәсәйҙә ул быға тиклем бер нисә тиҫтә йыл ҡулланылды, шуға күрә был формат өлкән быуынға нығыраҡ таныш булырға тейеш. Үҙәк һайлау комиссияһы быйыл тағы ла ошо механизмды ҡуллана. Һайлаусыларҙы мәғлүмәт менән таныштырғанда мобиль ҡушымта менән файҙаланыу ҡаралған. Ул һайлаусылар исемлеген асыҡларға һәм алдағы һайлауҙар, тауыш биреү ысулдары тураһында бөтә кәрәкле мәғлүмәтте бирергә, һаулыҡ мөмкинлектәре сикләнгән, оло йәштәге кешеләрҙең өйҙә тауыш бирергә теләүен теркәп ҡуйырға мөмкинлек бирә, - тине Александр Степанович. — Минеңсә, өйҙән-өйгә йөрөү инициативаһы дөрөҫ, көнүҙәк һәм тулыһынса аҡлана. Интернетта хәҙер төрлө мәғлүмәт күп, шуға күрә һайлаусыларға шәхси аралашыу аша, һорауҙар биреп асыҡлау еңелерәк. Унан тыш, бындай алым - төпкөлдә йәшәгән йәки электрон аралашыу сараларын тулыһынса ҡулланмаған кешеләргә һайлауҙар тураһында һөйләүҙең берҙән-бер юлы ла. Башҡортостандың Үҙәк һайлау комиссияһында билдәләүҙәренсә, обходчиктар менән эшләү хәүефһеҙ. Участка һайлау комиссиялары вәкилдәренең танытмаһы, триколор төшөрөлгән V хәрефе рәүешендәге значогы, аҡ жилеты һәм һайлау кампанияһы логотибы һалынған сумкаһы, телефоны йәки планшеты була. Һайлаусы уларҙан паспортын күрһәтеүҙе лә һорай ала. Башҡортостан Үҙәк һайлау комиссияһынан. Фото: А. Кобыскандың шәхси архивынан.